DILI, 02 fevereiru 2025 (TATOLI)- Traballadór timoroan ida husi munisipiu Covalima ho naran Ariano Frenquy de Deus Lima, tinan 36, hakotu iis, domingo ne’e, iha tuku 09:40 AM, iha Austrália.
Ho akontesimentu ne’e, Embaixadora Timor-Leste iha Camberra, Austrália, Ines Almeida, informa nia-parte simu ona informasaun katak traballadór timoroan ida mate iha Tasmania Berries.
¨Agora polísia Austrália sei halo investigasaun hodi hatene loloos motivu husi timoroan ne’e nia mate tanba agora ita seidauk hatene motivu husi nia mate ne’e. Tanba Embaixada foin simu informasaun ohin dader husi Tasmania Barries katak ita nia traballador timoroan ida ne’ebé servisu ne’ebá mate¨, informa Embaixadora ne’e ba Ajénsia TATOLI liuhusi via telephone, domingu ne’e.
Embaixadora ne’e hatutan, ba prosesu transladasaun mate-isin traballdór ne’e sei halo koordenasaun ho empreza Tasmania Berries ne’ebé mak matebian servisu ba.
Ariano Frenquy de Deus Lima nu’udar traballadór timoroan ne’ebé pasa iha programa Pacific Australia Labour Mobility (PALM Scheme) ne’ebé hahú bá Austrália iha loron 16 Septembru 2024 no servisu iha empreza ho naran QLD Farm, Sunshine Berries iha Austrália.
Matebian halo servisu iha empreza referidu iha fulan-rua nia laran, nunee iha inisiu fulan Novembru 2024 matebian muda fali ba empreza ho naran Tasmania Berries.
Tuir planu matebian atu fila mai Timor-Leste iha loron 03 Abríl 2025, maibé la konsege tanba matebian hakotu ona iis.
Jornalista: Natalino Costa
Editór: Florencio Miranda Ximenes