iklan

JUSTISA, HEADLINE

KFP pose funsionáriu 74 husi Ministériu Justisa

KFP pose funsionáriu 74 husi Ministériu Justisa

Ministru Justisa, Sergio de Jesus Fernandes da Costa Hornai, hamutuk ho Prezidente Komisaun Funsaun Públika, Agostinho Letêncio de Deus, Vise-Ministru Fortalesimentu Institusionál, Paulo Remédios no kargu xefia sira foto hamutuk ho emposadu na’in 74 iha resintu Ministériu Justisa, Colmera, Dili, tersa (04/02/2025). Imajen TATOLI/Natalino Belo

DILI, 04 fevereiru 2025 (TATOLI)—Prezidente Komisaun Funsaun Públika (KFP), Agostinho Letêncio de Deus, akompañadu husi Ministru Justisa, Sergio de Jesus Fernandes da Costa Hornai, fó pose ba funsionáriu foun husi Ministériu Justisa (MJ) hamutuk na’in 74.

Agostinho Letêncio hateten rekrutamentu ne’ebé Komisaun Funsaun Públika hamutuk ho Ministériu Justisa halo ne’e liuhusi prosesu ne’ebé rigór.

“Onra ida ba Komisaun Funsaun Públika, tanba partisipa serimónia ida-ne’e no serimónia ida-ne’e nia prosedimentu formál tebes. Ne’e hatudu katak prosesu ingresu ba servisu administrasaun la’ós prosesu ida-ne’ebé mak ita túr-túr eskolla de’it, maibé prosesu sira ohin ne’e vinkula ho lei,” nia hateten liuhusi nia intervensaun iha salaun MJ, Colmera, Dili, tersa ne’e.

Nia husu ba funsionáriu foun Ministériu Justisa na’in 74 ne’ebé simu pose ona ne’e servisu tenke ho fuan ho laran, tenke espíritu abnegasaun no espíritu tenke serbí públiku tuir duni juramentu sira ne’ebé temi ona iha ata pose.

Nia dehan, kontratu serbisu ne’ebé asina ohin ba tinan ida de’it, tanba ne’e husu funsionáriu foun Ministériu Justisa tenke hatudu atitude ne’ebé di’ak iha serbisu fatin no kuandu funsionáriu ida mak hatudu nia komportamentu di’ak, ne’e  instituisaun difísil atu husik.

Nune’e mós, Vise Ministru Fortalesimentu Institusionál, Paulo Manuel da S. dos Remédios, husu ba funsionáriu foun Ministériu Justisa ne’ebé simu pose tenke servisu ho responsablidade.

“Hanesan funsionáriu ka ajente administrasaun públika tenke serbisu ho disiplina, pontuál no serbí públiku ne’ebé di’ak no ha’u husu uza patrimóniu Estadu ba asuntu serbisu, la’ós uza sasán Estadu bá fali interese privadu,”  nia fó hanoin.

Iha fatin hanesan, Ministru Justisa, Sergio Hornai parabeniza funsionáriu foun Ministériu Justisa na’in 74 no solisita funsionáriu hirak-ne’e tenke presta servisu ne’ebé di’ak ba públiku.

“Ha’u hakarak reitera katak hamutuk ho Ministériu Justisa nia naran no dirijente tomak komprometidu hametin ita-nia rekursu umanu hodi presta servisu ne’ebé di’ak ba públiku. Ida-ne’e mak ita hakarak no ita atu orienta ba kualifikasaun ne’ebé aas no laiha interrupsaun,” nia konklui.

Funsionáriu na’in 74 ne’e kompostu husi guarda prizionál na’in 72, motorista Ministériu Justisa nian na’in rua. Funsionáriu Ministériu Justisa na’in 74 ne’e konkorre iha vaga ba rekrutamentu ne’ebé Ministériu Justisa anúnsia iha tinan kotuk ba área administrasaun, kondutór no guarda prizionál.

Hafoin fó pose ba funsionáriu Ministériu Justisa foun, Ministru Justisa akompaña Prezidente Komisaun Funsaun Públika, Vise Ministru Fortalesimentu Institusionál no kargu xefia Ministériu Justisa entrega mós Carro Célula foun tolu ba prizaun Becora, Gleno no Suai atu utiliza apoia atividade prizaun tolu referida.

Jornalista: Natalino Costa

Editór: Xisto Freitas da Piedade

iklan
iklan

Leave a Reply

iklan
error: Content is protected !!