DILI, 05 fevereiru 2025 (TATOLI)—Ministru Justisa, Sergio de Jesus Fernandes da Costa Hornai orienta Servisu Nasionál Kadastru (SNC, sigla portugés) atu halo fali levantamentu uma no rai Estadu nune’e Estadu bele fó titularidade ba rai no uma ne’ebé pertense ba domíniu Estadu nune’e mós domíniu privadu.
“Horisehik ha’u reuniaun ho sira (SNC) to’o loraik, ho objetivu atu konsolida Diresaun Nasionál Kadastrál ninian oinsá mak sira bele halo hodi prosede averbamentu ba iha rai sira ne’ebé mak iha titularidade,” Sergio Hornai hateten ba Tatoli iha nia kna’ar fatin, Colmera, kuarta ne’e.
Nia dehan, levantamentu dadus ne’e importante atu tékniku SNC bele konsolida domíniu Estadu no domíniu privadu ba baze dadus.
“Sira bele tún iha terenu hodi halo levantamentu tau iha baze dadus ne’ebé ita iha ona no karik bele halo reverifikasaun ruma, tanba razaun mota lori tiha estaka balun ne’ebé Servisu Nasionál Kadastrál tau ona,” nia adianta.
Hornai rekoñese katak SERVER ba sistema levantamentu baze dadus rai iha Servisu Nasionál Kadastrál mosu interrupasaun uitoan tanba kauza inundasaun ne’ebé mosu iha 04 abríl 2021, maibé Diretora Servisu Nasionál Kadastrál esforsa an maka’as halo kedas akizisaun ba ekipamentu sira-ne’e no halo instalasaun nune’e agora servisu komesa la’o.
Antes ne’e, iha 25 jullu 2014, tempu V Governu Konstitusionál nian, Primeiru-Ministru, Kay Rala Xanana Gusmão no Primeiru-Ministru Repúblika Portugeza, Pedro Passos Coelho, hamutuk ho Ministru Justisa, Dionísio Babo, lansa projetu Sistema Nasionál Kadastru (SNC-sigla portugés), iha edifísiu SNC, Kintál Boot, Dili.
Ministru Justisa Dionísio Babo hateten, implementasaun projetu SNC ne’e atu halo levantamentu ba rai hodi hatama dadus ba sistema modernu ho teknolójia foun. Timoroan sira ne’ebé tuir formasaun no integra iha projetu ne’e hamutuk na’in 150. Tuir planu, iha futuru timoroan hirak-ne’e sei hala’o servisu iha Sekretaria Estadu Terras e Propriedades nia okos.
Ministru Justisa hatutan durante okupasaun portugés to’o agora, Timor-Leste seidauk iha Sistema Kadastru Nasionál hodi akumula dadus kona-ba rai. Maibé, agora Konsellu Ministru aprova ona projetu SNC, hodi implementa iha Timor-Leste, durante tinan 6 ho objetivu halo levantamentu dadus ba rai iha territóriu Timor tomak.
“Sira halo levantamentu hodi garante dezenvolvimentu rai iha nasaun ne’e. Husu ba timoroan hotu atu koopera ho ekipa SNC, fó informasaun loloos kona-ba rai iha territóriu laran. Tanba informasaun sira-ne’e sei fó benefísiu ba povu, atubele hetan sertifikadu ba rai,” Dionísio Babo dehan.
Projetu ne’e realiza tanba serbisu hamutuk entre kompañia Grupo Média Nasionál (GMN) ho kompañia Holding Arm Apprize hosi Portugál, hodi halo levantamentu ba kadastrál iha distritu sira.
Jornalista: Natalino Costa
Editór: Xisto Freitas da Piedade
