BOBONARO,05 fevereiru 2025 (TATOLI)—Prezidente Autoridade Munisípiu (PAM) Bobonaro, Alexandre Pires, kuarta ne’e, halo inaugurasaun ba projetu konstrusaun barrajen 800 ne’ebé satan mota Maumela I, iha suku Atudara, postu Cailaco, munisípiu Bobonaro ne’ebé konstrui liuhusi programa Planu Integradu Dezenvolvimentu Munisipál (PDIM) 2024.
Iha intervesaun PAM Bobonaro, Alexandre Pires, hateten “Obra ne’e Autoridade Munisípiu kontrui atu proteje no salva komunidade nia vida, tanba kada tinan bainhira udan-boot sempre akontese inundasaun to’o rezulta estraga uma, animál inklui plantasaun,” PAM Bobonaro hato’o iha nia intervensaun, kuarta ne’e.
Diretóra Kompañia Ely Karya Unipesoál, Lda, Elisia dos Santos Pires, afirma tuir kontratu obra ne’e entrega iha fulan-setembru 2024 maibé la konsege finaliza tanba na’in ba kompañia Ely Karya, José Pires mate husik ona mundu.
“Ha’u nia pai mós mate iha fulan-setembru, entaun ami para servisu tanba hetan difikuldade oioin. Maibé, ami agradese ba Maromak iha Janeiru ne’e konsege finaliza, ami garante kualidade, tanba projetu ida-ne’e ami kaer ho fuan no laran hodi oferese ba komunidade. Ami husu atu mantein nafatin servisu hamutuk, atu nune’e obra ne’e kontinua di’ak,” nia hateten.
Xefe suku Atudara, Manuel Ximenes, hato’o agradese ba Autoridade Munisípiu Bobonaro no konsidera barajen ne’e bele satan ona korrente mota Maumela I.
“Mota ne’e tinan-tinan sempre fó ameasa ba uma kain 60-resin, sede suku no Ensinu Báziku Filiál (EBF) Atudara Maumela no Pre-Eskolár ida-ne’ebé mak harii iha sede suku nia leten,” nia dehan.
Enkuantu obra ne’e konstrui iha fulan-maiu iha tinan 2024 ho totál orsamentu hamutuk $234,521.08.
Notísia Relevante: PAM Bobonaro lansa projetu barrajen iha mota Maumela
Jornalista : Sergio da Cruz
Editór : Cancio Ximenes
