DILI, 06 fevereiru 2025 (TATOLI)—Abertura ba rekrutamentu membru Polísia Nasionál Timor-Leste (PNTL) foun hein diploma ministeriál husi Ministu Interiór.
“Presiza diploma ministeriál maibé bainhira atu hasai diploma ne’e kompeténsia ministru nian,” Komamdante Pesoa no Formasaun, Superintendente Xefe Polísia, Arquimino Ramos, hateten ba jornalista sira iha Palácio do Governo, kinta ne’e.
Arquimino informa katak kona-ba kritériu rekrutamentu Komandu Pesoa Formasaun antes ne’e enkamiña ona ba iha Komandante Jerál PNTL no Komandante Jerál mak iha kompeténsia hodi submete ba Ministru Interiór.
“Kritéria sira-ne’e ami aprezenta ona bá komandante jerál, depois sei hatutan bá Ministru Interiór hodi hasai diploma ida depois mak kontinua ba rekrutamentu,” nia adianta.
Notísia relevante: Aprova ona rezolusaun Governu ba rekrutamentu PNTL iha tinan ne’e
Nia rejeita fó komentáriu kle’an kona-ba kritériu rekrutamentu membru PNTL nian tanba hein diploma ministeriál.
“Ha’u labele ko’alia lai tanba orsida ita ko’alia mak diploma ministeriál ne’e sai ko’alia buat seluk ida, entaun ne’e susar ba ita atu esplika. Di’akliu ita hein diploma ministeriál sai tiha mak ita foin ko’alia,” nia esklarese.
Rekorda fali katak iha kuarta (5/2), Konsellu Ministru aprova ona proposta rekrutamentu ba membru PNTL foun no promosaun diviza ba membru polísia sira. Membru PNTL ne’ebé mak Governu liuhusi Komandu Jerál PNTL atu rekruta mak hamutuk 500 kompostu husi ajente na’in 400 no ofisial na’in 100.
Jornalista: Natalino Costa
Editór: Xisto Freitas da Piedade
