DILI, 06 fevereiru 2025 (TATOLI)—Komandante Pesoa no Formasaun, Superintendente Xefe Polísia, Arquimino Ramos, hateten estatutu kriasaun Institutu Superiór Siénsia Polísia (ISSPol) submete ona bá gabinete Ministru Interiór hodi hein lori bá Konsellu Ministru atu hetan aprovasaun.
Nia dehan, komisaun instaladora ba estabelesimentu ISSPOL molok ne’e submete ona dokumentu kriasaun ba Ministériu Ensinu Superiór Siénsia Kultura iha tinan kotuk no Ministériu Ensinu Superiór Siénsia Kultura halo ona avaliasaun ba dokumentu referidu. Maibé, depoizde haree tiha, Ministériu Ensinu Superiór entrega fila dokumentu sira-ne’e bá komisaun instaladora atu kompleta buat balun.
“Pedidu lisensiamentu ita hato’o ona bá Ministériu Ensinu Superiór, agora sira fó filafali dokumentu sira-ne’e para ita atu hadi’a no ami hadi’a ona. Estatutu ne’e ninia ezbosu iha ona gabinete Ministru Interiór nian, depois sei lori bá Konsellu Ministru aprova tiha mak ita lori fali bá Ministériu Ensinu Superiór Siénsia Kultura para bele hetan lisensa operasionál,” Arquimino Ramos tenik ba jornalista sira hafoin partisipa sosializasaun Kuartu Kursu Estudu Maiór Konjuntu Integradu (CEMCI-sigla portugés) ne’ebé organiza husi Institutu Defeza Nasionál iha Palácio do Governo, kinta ne’e.
Nia esplika, dokumentu ne’ebé presiza kompleta mak estatutu ba estabelesimentu Institutu Superiór Siénsia Polísia, tanba ne’e agora komisaun konklui ona no submete ona bá Gabinete Ministru Interiór (MI).
Arquimino garante katak antes fulan-jullu estatutu ne’e bele hetan ona aprovasaun husi Konsellu Ministru.
“Data ne’ebé sira fó-sai ba ami katak antes fulan-jullu ne’e ami tenke aprezenta dokumentu aprovasaun ba Ministériu Ensinu Superiór para Institutu Siénsia Polísia bele hetan lisensa operasionál,” nia konklui.
Jornalista: Natalino Costa
Editór: Xisto Freitas da Piedade
