OEKUSI, 06 Fevereiru 2025 (TATOLI)– Komandu Polísia Nasionál Timor-Leste (PNTL) Rejiaun Administrativa Espesiál Oekusi Ambeno (RAEOA), preparadu kontinua asegura seguransa ba eleisaun órgaun suku volta daruak ne’ebé sei akontese iha loron 10 Fevereiru 2025.
“Eleisaun segundu ronde ne’ebé sei akontese iha loron 10 ne’e ita preparadu no prontu atu asegura. Nune’e ha’u husu ba populasaun hotu liuliu iha suku Kutete no Monemeko presiza kontribui, nune’e prosesu eleisaun la’o hakmatek no susesu to’o nia finalidade,” dehan Komandante PNTL RAEOA, Superintendente Polísia, Nicolau Francelino da Costa iha kna’ar fatin, ohin.
Notísia relevante:CNE nota eleisaun órgaun suku iha Kutete-Monemeko la’o di’ak
Kona-ba situasaun seguransa durante eleisaun suku rua iha fulan-Janeiru foin lalais, situasaun la’o di’ak, tanba hetan apoia másimu husi forsa destakadu F-FDTL no Batallaun Ordén Públiku (BOP), UPF no mós husi Unidade Polísia Marítima (UPM).
“Hahú husi prosesu dezlokasaun materiál sensitivu no la’ ós sensitivu iha loron 24 Janeiru 2025 ba to’o sentru votasaun buat hotu la’o di’ak, ne’ebé durante eleisaun ne’e la’o iha suku rua, situasaun la’o hakmatek no kontroladu laiha disturbu no barrullu ne’ebé akontese iha sentru votasaun sira ita la rejista kazu ruma,”
Tanba nu’udar Komandante Rejiaun Oekusi, parabeniza maturidade komunidade sira tanba kontribui ona iha eleisaun orgaun suku volta dahuluk.
“Ha’u hanoin eleisaun la’o foun ba komunidade sira, maibé sira komprende muito-bem kona-ba lala’ok eleisaun, katak sé mak manán ita-nian hotu no sé mak lakon ita kontribui atu hadi’a rai ne’e,” nia orgullu.
Notísia relevante:Eleisaun suku iha Kutete hakat ba segunda volta
Jornalista: Abílio Elo Nini
Editór: Florencio Miranda Ximenes
