OEKUSI, 07 Fevereiru 2025 (TATOLI)– Sekretária Rejionál ba Edukasaun no Asuntu Sosiál (SREAS), distribui ona karteira eskolá hanesan kadeira no meza unidade 40 ba Eskola Bázika Filiál (EBF) iha suku Bobometo, sub-rejiaun Oésilo, Rejiaun Administrativa Espesiál Oekusi Ambenu (RAEOA).
Molok ne’e, Edukasaun RAEOA iha planu ba oráriu distribuisaun kadeira no meza ba eskola sira-ne’ebé menus mobiliáriu, tanba iha 2024 kompañia hatama ona kadeira-meza hamutuk 2.500 iha armazein edukasaun Oekusi.
“Planu loloos ami atu distribui ona iha Janeiru liuba maibé ami iha polítika ida katak, ita haree lai alunu sira-nia hala’o prosesu aprendizajen lo’os ona mak foin disribui tanba atu hatene loloos totál estudante. Iha eskola ne’e estudante foun hamutuk 40 mak ita distribui karteira eskolár unidade 40,” Sekretária Rejionál Edukasaun no Asuntu Sosiál, Inácia Tamele, afirma hafoin distribui karteira eskolar ba eskola referidu iha Oésilo.
Ho apoiu ne’e, nia fó hanoin ba manorin sira no estudante sira atu utiliza kadeira no meza sira ho di’ak.
“Ha’u husu lideransa sira iha eskola atu hatama pedidu bainhira menus karteira eskolár. Tanba la’os iha Oekusi de’it maibé Timor-Leste tomak sempre hasoru problema hanesan ne’e, maibé Ministériu Edukasaun buka dalan atu bele responde. Nune’e ha’u husu atu uza mobiliáriu sira ho didi’ak ba tempu naruk. Labele estraga no riska halo koor oioin,” nia apela.
Iha fatin hanesan, Koordenadór EBF Oésilu, Leonardo Oqui, agradese ba edukasaun rejionál tanba bele responde urjente ba preokupasaun kona-ba kadeira no meza hodi fasilita EBF Oesilo.
“Ami agradese tebes ba edukasaun, tanba ohin mai oferese kadeira no meza iha ami nia eskola bazeia ba ami nia preokupasaun. Tanba iha hatene foin daudaun imajén ida, alunu sira tuur iha rai mak hakerek ida-ne’e ita sente ladún furak, maibé agradese ho problema ne’e ohin rezolve ona,” nia orgullu.
Totál estudante EBF Oésilo hamutuk 343 ho profesór na’in-hitu no guarda eskola na’in-rua.
Notísia relevante:Edukasaun RAEOA konsege utiliza fundu konsesaun eskolár hodi hadi’a eskola sira
Jornalista: Abílio Elo Nini
Editór: Florencio Miranda Ximenes
