DILI, 07 fevereiru 2025 (TATOLI)–Ministru Negósiu Estranjeiru no Kooperasaun (MNEK), Bendito Freitas, informa, Timor-Leste lakon belun boot Aga Khan IV ne’ebé hakotu ona peregrinasaun iha mundu ne’e iha loron 04 fevereiru, iha Lisboa-Portugal.
Aga Khan IV hanesan líder espirituál husi musulmanu ismaili sira no xefe husi rede dezenvolvimentu globál.
“Lider Aga Khan ne’ebé mate ne’e hanesan lakon boot ida, tanba hanesan líder ida-ne’ebé dinámiku, no influénsa tebes. Nia mak lidera fundasaun Aga Khan, fundasaun ida-ne’ebé haree barak liu programa kona-ba dezenvolvimentu sosiál, liuliu ba klase favóritu iha mundu ne’e,” Ministru Bendito hateten ba jornalista sira, iha edifisiu MNEK, Praia dos Coqueiros, sesta ne’e.
Ministru ne’e dehan tan, “señor ne’e mate ho legadu ida di’ak tebes liuliu iha nia serbisu fatin, ha’u hanoin Prezidente Portugal Rebelo Sousa mós manifesta solidaridade, hato’o kona-ba pedra ne’ebé sente kona-ba señor ne’e nia falesimentu,”
“Ita Timor fó ona karta kondelénsia hodi espresa ita-nia solidaridade ba Aga Khan nia falesimentu ne’e,” nia tenik.
Notísia relevante : Portugal hakarak hametin kooperasaun iha área saúde militár
Nia dehan, Timor-Leste hato’o karta kondolénsia tanba iha fulan-novembru tinan kotuk Governu asina ona akordu serbisu hamutuk ho fundasaun Aga Khan, liuliu iha área edukasaun, nutrisaun no parte importante balun tan.
Koñese Aga Khan IV
Aga Khan IV hanesan líder espirituál husi musulmanu ismaili sira no xefe husi rede dezenvolvimentu globál ida-ne’ebé iha influénsia. Mate iha loron 04 fevereiru 2025, iha Lisboa, Portugal, ho tinan 88.
Notísia triste ida-ne’e fó sai hosi Rede Dezenvolvimentu Aga Khan (AKDN) ne’ebé hanesan organizasaun ne’ebé horii ho papél boot iha dezenvolvimentu iha parte oioin iha mundu.
Iha komunikadu ofisiál ne’ebé fó sai hosi AKDN, hatete katak “Nia Alteza Reál Liurai-mane Karim Al-Hussaini, Aga Khan IV, Imam ba dala-49 husi musulmanu Xiita Ismaili no dezendente diretu husi Profeta Muhammad (pbuh), mate ho dame iha Lisboa no hale’u husi nia família.”
Rede dezenvolvimentu mós hateten katak anúnsiu kona-ba nia substituisaun sei halo iha tempu badak liuhusi X nia plataforma rede sosiál nian.
Líder Globál ba espiritualidade no dezenvolvimentu
Aga Khan IV lidera ona komunidade musulmanu Ismaili nian dezde 1957, hafoin troka nia avó, Sir Sultan Mahomed Shah Aga Khan. Iha tempu neʼebá, nia foin tinan 20.
Iha nia lideransa nia okos, nia la’ós de’it sai líder espirituál ba seguidor millaun 15 resin iha mundu tomak maibé mós hala’o inisiativa dezenvolvimentu oioin liuhosi AKDN, ne’ebé nia harii iha tinan 1967.
Rede ne’e jere instituisaun dezenvolvimentu internasionál lubuk ida ho funsionáriu liu 80.000. Programa neʼe inklui harii eskola, ospitál, no fornese eletrisidade ba ema millaun ba millaun iha área kiak sira iha Áfrika no Ázia.
Aga Khan IV mós envolve iha mundu negósiu ho propriedade iha indústria oioin, inklui farmaséutiku, banku, no fábrika rede peska nian iha Uganda.
Rikusoin Patrimóniu no Mundu Korrida Kuda
Nu’udar figura globál, Aga Khan koñesidu nu’udar filantropu no emprezáriu susesu. Ninia rikusoin kalkula entre millaun $800 no biliaun $13, ne’ebé mai husi eransa família, negósiu turizmu, propriedade, no indústria halai kuda.
Iha mundu korrida kuda, nia naran hetan respeitu maka’as. Nia hetan tradisaun família nian iha desportu no hetan realizasaun boot barak.
Hafoin manán kampionatu kuda-na’in fransés nian iha nia époka dahuluk, nia sai interesadu liután no mergulla iha indústria. Nia kuda sira ne’ebé famozu liu maka Sea the Stars no Sinndar, ne’ebé maka manán ona títulu prestijiadu sira hanesan Epsom Derby, Irish Derby no Prix de l’Arc de Triomphe.
Maibé, eventu ida ne’ebé famozu liu iha mundu korrida kuda nian maka lakon Shergar, kuda ida ne’ebé susesu liu. Kuda-burru kampeaun ne’e hetan sekuestru hosi Ballymany Stud Farm iha Irlanda iha Fevereiru 1983. Maski iha ezijénsia resgate no espekulasaun kona-ba envolvimentu hosi máfia, antigu líder líbiu Muammar Gaddafi no IRA, laiha osan ne’ebé selu no Shergar nunka hetan.
Desendente no legadu
Aga Khan IV maka desendente diretu ida hosi Profeta Muhammad liuhosi Ali ibn Abi Thalib no Fatimah Az-Zahra. Títulu “Aga Khan” rasik fó uluk hosi Imperadór Pérsia nian ba nia bei-ala iha sékulu XIX.
Aleinde sai líder espirituál, nia papél inklui fó orientasaun ba komunidade musulmanu Ismaili sira ne’ebé namkari iha Ázia Sentrál, Médiu Oriente, Ázia Súl, Áfrika Sub-Sahariana, Europa, no Amérika Norte.
Aleinde nia papél nu’udar líder relijiozu no filantropu, Aga Khan IV mós koñesidu nu’udar figura ida ne’ebé dalabarak muda hosi nasaun ida ba nasaun seluk. Nia iha sidadania britániku, fransés, suisu no portugés. Durante nia moris, nia fó osan millaun ba millaun atu ajuda ema kiak sira iha parte oioin iha mundu.
Jornalista : Hortencio Sanchez
Editór : Cancio Ximenes
