DILI, 08 Fevereiru 2025 (TATOLI)-Banku Nasionál Komérsiu Timor-Leste (BNCTL, sigla portugés), lansa website (portál) foun hanesan avansu fundamentál ida hodi mellora esperiénsia bankária ba Timoroan hotu.
Serimónia lansamentu ne’e realiza iha Night Market, Timor-Plaza, nune’e informa ba públiku no kliente sira hotu atu vizita www.bnctl.tl hodi asesu ba servisu banku nian ne’ebé adapta tuir ita boot sira nia hakarak.
Plataforma dijitál ne’e hanesan odamatan ba servisu bankáriu modernu, permite kliente asesu servisu no produtu importante banku nian iha kualker fatin no kualker momentu, tantu iha Timor-Leste no iha rai liur’,’ refere nota imprensa ne’ebé TATOLI, I.P asesu, ohin.
Hanesan portál dijitál ba banku modernu, website ne’e otimiza asesu tantu liuhusi komputadór, laptop nomós dispozitivu movel sira hanesan telemovel, hodi garantia uzuáriu sira bele asesu nesesidade bankária nian ho forma prátika, tantu iha uma, servisu fatin ka fatin ne’ebé de’it.
Site ne’e aprezenta feramenta oioin no amigavel tebes, no fó autonomia poder ba kliente sira atu; halo kalkulu empréstimu ka kréditu rasik, asesu ba mapa lokalizasaun sukursais, ajénsia, unidade, ATM (mákina kaixa automátika) sira no ajente banku, haree informasaun kona-ba ajente banku no servisu dijitál sira.
Aleinde ida ne’e, BNCTL mós garantia medida seguransa no asesibilidade avansada hodi garantia dadus klientes ne’ ebé seguru iha servisu online.
Hahú husi konta individu to’o solusaun ba negósiu, BNCTL mak ita-boot sira nia parseiru iha kresimentu finansiál. Ami nia website foun fortalese komprimisu hodi fornese solusaun bankárias segurus no asesíveis.
Notisia relevante: BNCTL Viqueque introdús kréditu fiar ba feto sira iha Lacluta
Jornalista : Felicidade Ximenes
Editór: Florencio Miranda Ximenes
