DILI, 11 fevereiru 2025 (TATOLI)—Diretór Sekretariadu Tékniku Administrasaun Eleitorál (STAE) Manatuto, Mariano Natalino Soares da Silva, hateten kandidatu Francisco Paulo Soares eleitu sai xefe suku Iliheu, postu administrativu Manatuto, munisípiu Manatuto, ho votu 402.
“Horisehik,10 fevereiru, ita hahú hikas eleisaun órgaun suku ba segunda volta iha suku ne’e, iha-ne’ebé iha suku Iliheu ne’e Francisco Paulo Soares mak eleitu ba xefe suku,” Mariano Natalino Soares da Silva, ba TATOLI via telefónika, tersa ne’e.
Nia haktuir, husi suku Iliheu ne’e, kandidatu númeru 1 ho naran Antoninho Soares hetan votu hamutuk 260, kandidatu númeru 2 Francisco Paulo Soares ho votu 402.
Notísia relevante: Eleisaun líder suku iha Manatuto, Laku Mesak primeira volta, Iliheu segunda volta
Nia esplika, suku Iliheu iha aldeia rua mak hanesan Ilihuli ho Ihun. Aldeia Ilihuli totál eleitór hamutuk 475, feto 115 no mane 156 no sira ne’ebé vota hamutuk 271 no sira ne’ebé la vota hamutuk 204.
Enkuantu, aldeia Ihun totál eleitór hamutuk 555, feto hamutuk 180, mane 220, ne’ebé mak mai vota hamutuk 400 no sira ne’ebé la vota hamutuk 155.
Iha eleisaun primeira volta, 25 janeiru 2025, kandidatu sira ne’ebé kompete iha suku foun Iliheu mak hanesan Antoninho Soares ho votu hamutuk 183, Jentelino G. Soares ho votu 169 no Francisco Paulo Soares ho votu 342.
Husi rezultadu hatudu katak kandidatu hirak-ne’e la hakat liu barreira 50%+1. Tanba ne’e, kandidatu ne’ebé avansa ba segunda volta mak Antoninho Soares no Francisco Paulo Soares.
Estabelesementu suku foun sira iha Timor-Leste bazeia ba Lei Suku númeru: 19/2023 ne’ebé previstu iha artigu 91, iha-ne’ebé fó kompeténsia ba Ministériu Administrasaun Estatál (MAE) deside kriasaun suku foun referidu.
Jornalista: Felicidade Ximenes
Editór: Xisto Freitas da Piedade
