DILI, 11 fevereiru 2025 (TATOLI)—Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa klarifika akontesimentu eletrisidade soke-mate ema ho defisiénsia mentál iha área Hospital Nacional Guido Valadares, Bidau Toko Baru, Dili, domingu (9/2).
Nia haktuir, polísia to’o iha fatin akontesimentu hodi halo asaun liuhusi aviza vítima atu tún husi torre eletrisidade tanba perigu, maibé vítima ulun moruk no aleinde ne’e informa mós ba Eletricidade de Timor-Leste (EDTL) maibé parte kompetente dehan perigu.
“Polísia halo mak koordena ho EDTL, xefe aldeia, parte ospitál no komunidade iha Bidau no ami-nia ekipa mós iha terenu. Ita labele asiste ema-nia vídeo depois hateten polísia halo eksen. Ita la haruka ita-nia polísia atu bá iha ne’ebá para halo eksen,” nia dehan ba jornalista sira hafoin partisipa serimónia treinamentu Ofisiál Polísia Suku (OPS) ne’ebé halo iha Sentru Formasaun Polísia (CFP-sigla portugés) Comoro, tersa ne’e.
Vítima ne’e ho naran Teodora de Jesus (31), oan rua no hela ho família iha área Tibar, postu administrativu Bazartete, munisípiu Likisá. Tanba kondisaun ne’ebé nia enfrenta, halo nia tenke dezloka husi Tibar bá Bidau sein objetivu.
Amélia de Jesus, inan husi vítima haktuir bá jornalista katak iha domingu purvolta tuku 15:00 Otl, nota vítima sei iha uma no depois ne’e hakat sai bá li’ur. Maizumenus tuku 18:00 Otl hanesan ne’e, rona katak vítima eletrisidade soke-mate ona iha área ospitál nasionál ninian.
Nia rekoñese katak durante ne’e ninia oan nunka simu diagnóstiku ofisiál no nein simu kualker tipu akompañamentu husi médiku ka psikolójiku sira.
Entretantu, xefe aldeia Bidau Toko Baru, Anita de Almeida, informa katak nia tenta atu konvense vítima para labele sa’e torre eletrisidade maibé la konsege no hanesan autoridade lokál, kontata mós polísia atu koordena EDTL para asegura vítima maibé autoridade relevante responde tarde.
Jornalista: Natalino Costa
Editór: Xisto Freitas da Piedade
