DILI, 11 fevereiru 2025 (TATOLI)—Diretór Polísia Sientífika Investigasaun Kriminál (PCIC-sigla portugés), Vicente Fernandes e Brito, hateten durante nia mandatu hahú husi 2015 to’o 2025, aplika ona sansaun disiplinár ba investigadór PCIC na’in-tolu.
“Dezde 2015 sa’e mai, ita halo aplika sansaun disiplinár ba investigadór na’in-tolu,” Vicente hateten ba jornalista TATOLI iha nia kna’ar fatin, Colmera, tersa ne’e.
Nia dehan, investigadór na’in-tolu ne’ebé hetan sansaun disiplinár tanba envolve kazu pose arma, abandona serbisu no ladún tau atensaun ba serbisu.
“Membru sira-ne’e envolve kazu pose arma, abandona serbisu hansesan bainhira nia pikete ema hato’o keixa sira toba tiha, sira la halo serbisu. Pur-ezemplu, kazu balun sira la halo investigasaun no sira halo investigasaun maibé dalaruma kumpre prazu beibeik, ita halo averiguasaun ita halo suspensaun no ita aplika sansaun disiplinár ba sira, halo suspensaun fulan tolu no to’o tinan ida,” Vicente haktuir.
Vicente esplika, suspensaun ne’e ninia objetivu prinsipál mak bele kontribui ba prevensaun, bele prevensaun espesiál no prevensaun jerál.
“Ita halo averiguasaun kuandu ita iha dúvida. Kuandu prova kompletu ona ita labele halo tan averiguasaun, tanba averiguasaun perde tempu ona. Ita bá halo prosesu disiplinár imediatu,” nia konklui.
Antes ne’e, Diretór PCIC simu ona informasaun ne’ebé hateten katak membru PCIC ida uza arma ameasa joven sira iha sábadu foin daudaun ne’e, iha Delta 4.
Tuir nia, membru ne’e investigadór ida iha PCIC maibé tanba kestaun prezunsaun inosénsia, entaun labele temi nia naran maibé kuandu iha inísiu sei aplika sansaun disiplinár ba membru referidu.
“Ohin mak ha’u simu informasaun ne’e. Portantu, ita iha prosedimentu própriu. Ne’e signifika katak laiha investigadór ida, laiha espesialista ida, laiha funsionáriu PCIC atu afasta husi responsabilidade,” nia afirma.
Nia dehan, ba kazu ida-ne’e nia la halo averiguasaun maibé aplika kedas sansaun disiplinár ba oknum PCIC ne’ebé envolve kazu referidu tanba faktu hatudu katak autór ameasa duni ema ho arma.
“Ha’u la halo prosesu averiguasaun. Averiguasaun enkuantu ita iha dúvida, más kuandu ha’u simu informasaun ne’e iha indísiu forte ha’u bá diretamente prosesu disiplinár,” realsa.
Jornalista: Natalino Costa
Editór: Xisto Freitas da Piedade
