DILI, 12 Fevereiru 2025 (TATOLI)—Tribunál Judisiál Primeira Instánsia Dili (TJPID), kuarta ne’e, kontinua halo julgamentu ba kazu akizisaun ró speedboat rua ba Ministériu Edukasaun iha 2015.
Iha sala julgamentu, arguidu MCA deklara ba Tribunál katak momentu 2015 nia hanesan diretór jerál ba Ensinu Sekundáriu no Tékniku Vokasionál iha Ministériu Edukasaun, akizi ró rua ba Ministériu Edukasaun hodi transporta materiál ensinu nian bá eskola vokasionál Ataúru no Akar-Laran, munisípiu Kovalima, ne’e bazeia ba polítika Diresaun Ensinu Sekundáriu no Tékniku Vokasionál ministériu nian.
Tanba ne’e, hanesan diretór jerál, nia hato’o pedidu ba ministru hodibele halo akizisaun ró rua referidu.
“Akizisaun ró ne’e tama duni iha polítika ha’u-nian nu’udár diretór jerál Ensinu Jerál no Tékniku Vokasionál. Tanba ne’e, momentu ne’ebá, ha’u hato’o proposta ba Ministru Edukasaun atu halo aprovasaun atubele halo akizisaun,” arguidu MCA deklara iha sala audiénsia julgamentu TJPID, Kaikoli.
Notísia relevante: Tribunál julga arguidu hitu ba kazu akizisaun ró ba Ministériu Edukasaun
Arguidu esplika bainhira Ministru Edukasaun halo tiha aprovasaun ba proposta referida, Ministru Edukasaun despaxa kedas bá parte Administrasaun Finansa no aprovizionamentu atu prepara ba kontratu.
Arguidu rekoñese katak tuir kontratu, loloos ne’e Ministériu Edukasaun hola ró rua, maibé realidade empreza hola ró ida de’it.
“Ró ne’e mai duni momentu ne’e. Empreza entrega tiha mai ha’u no ha’u haree ró ne’e kondisaun di’ak no sira halo kedas teste ba ró ne’e iha tasi laran. Momentu ne’e, ró ne’e halo duni atividade operasionál hodi tula materiál Ministériu Edukasaun nian bá Ataúru no Suai,” arguidu haktuir.
Arguidu hatutan, maski nune’e, asesór Ministériu Edukasaun halo pareser ba Ministru Edukasaun iha momentu ne’ebá, katak ró ne’ebé Ministriu Edukasaun hola ne’e la prenxe kritériu atu tula sasán tanba ró ne’e ninia espesifikasaun ki’ik liu nune’e la nesesáriu tula sasán hodi halo transportasaun bá-mai iha tasi laran.
Nia dehan, ró ne’e hahú halo nia operasaun husi 2017 to’o 2019 no husi 2019 to’o mai agora ró ne’e labele halo nia atividade tanba mina laiha.
Arguidu haktuir hahú 2019 nia la asumi ona kargu hanesan Diretór Jerál Ensinu Jerál no Téknika Vokasionál iha Ministériu Edukasaun.
“Apartir 2019 mai leten, ha’u la asumi ona kargu hanesan Diretór Jerál Ensinu Jerál no Téknika Vokasionál iha Ministériu Edukasaun, tanba ne’e ha’u labele halo relatóriu hodi atualiza kondisaun ró,” nia konklui.
Antes ne’e, 15 Janeiru 2025, TJPID halo julgamentu ba aguidu na’in hitu ba kazu akizisaun ró rua ba Ministériu Edukasaun iha tinan 2015.
Arguidu na’in hitu mak ho inisiál hanesan DdC, MCA, MM, AdC, PAdRM, AFXR no CL.
Kazu ne’e akontese iha 2015 bainhira Ministériu Edukasaun anúnsia konkursu públiku ba akizisaun ró speedboat rua ho valór $142.400,00 atu fasilita serbisu Ministériu Edukasaun ba eskola Sekundária Ataúro no Eskola Téknika Volasionál ida iha Akar-Laran, Suai, Munisípiu Covalima. Nune’e, liuhusi konkursu ne’ebé Ministériu Edukasaun halo, empreza Chipys Unipessoal Lda, mak manán no hahú halo akizisaun iha momentu ne’ebá.
Maibé, depoisde prosesu sira-ne’e la’o to’o ohin loron, ró speedboat rua la mai tanba empreza la konsege halo akizisaun tuir kontratu ne’ebé mak molok ne’e selebra ona ho Ministériu Edukasaun.
Haree ba hahalok sira-ne’e, Ministériu Públiku akuza arguidu na’in hitu ba krime partisipasaun ekonomia iha negósiu ne’ebé punidu iha artigu 299 no krime abuzu podér ne’ebé previstu iha artigu 297 tanba arguidu sira konxiente katak hahalok sira-ne’e kontra lei maibé arguidu sira kontinua halo no hamosu prejuizu ba Estadu ho valór $142.400,00.
Jornalista: Natalino Costa
Editór: Xisto Freitas da Piedade
