DILI, 13 Fevereiru 2025 (TATOLI)—Diretór Jerál Servisu Rejistu Notariadu (DGSRN), Agostinho Gonçalves Vieira, hateten Diresaun Jerál Servisu Rejistu Notariadu planeia sei halo tan akizisaun ba Mákina Fargo.
“Ita buka atu hadi’a servisu atendimentu públiku liuliu liga ba emisaun Billete Identidade. Tanba ne’e mak ami buka prepara hela ona atu hola tan fargo ida tau tau iha Servisu Konservatóriu Rejistu Notariadu Munisípiu Dili, nune’e fasilita servisu atendimentu emisaun BI ba komunidade,” Agostinho hateten ba jornalista sira iha nia kna’ar fatin, Kolmera, kinta ne’e.
Agostinho hateten durante hanesan Diretór Jerál Servisu Rejistu Notariadu, kompromete katak sei mellora servisu atendimentu Billete Identidade inklui emisaun pasaporte ba komunidade.
“Atendimentu BI ba komunidade durante ne’e di’ak loos. Ami ezekuta duni orientasaun Ministru Justisa nian hodi halo impresaun Billete Identidade orijinál ba komunidade. Blanku ba BI ne’e iha. Sé mak hakarak halo orijinál halo pedidu submete mai para ami imprime orijinál,” nia informa.
Nia hatutan, ba emisaun pasaporte mós hanesan. Iha ema balun mak utiliza ajendamentu online, maibé ba hirak ne’ebé seidauk hatene utiliza ajendamentu online, liuliu katuas no ferik sira iha foho, bele lori dokumentu mai nune’e Servisu Rejistu Notariadu bele atende ho urjentemente.
“Atendimentu pasaporte durante ne’e la’o normal. Hahú husi agostu tinan kotuk to’o mai agora atendimentu la’o di’ak. Ema la forma naruk ona, tanba hanesan ha’u dehan ema mai mak kuandu iha difikuldade, ita despaxa sira bá hasai foto,” nia konklui.
Nia husu ba funsionáriu Diresaun Jerál Servisu Rejistu Notariadu katak tenke pontualidade bainhira hala’o funsaun, segundu mak mellora servisu iha servisu rejistu notariadu, terseiru mak tenke iha fasilidade ne’ebé adekuadu, nune’e bele fó atendimentu ne’ebé di’ak ba komunidade.
“Sira husu mak pontualidade funsionáriu sira iha oras servisu. Ida tan mak sira husu mellora servisu no halo akizisaun ba fasilidade sira. Sira mós husu katak tanba saida mak BI seidauk imprime orijinál maibé sei surat-tahan mutin nafatin,” nia tenik relasiona ho inspesaun ne’ebé hala’o husi ekipa konjunta Komisaun Funsaun Públika (CFP-sigla portugés), Komisaun Antí Korrupsaun (CAC-sigla portugés), Provedoria dos Direitos Humanos e Justiça (PDHJ) inklui Inspesaun Jerál Estadu (IGE-sigla portugés) iha segunda (10/2) foin lalais ne’e.
Antes ne’e, mosu preokupasaun ba atendimentu emisaun BI tanba mákina impresaun limitadu, nune’e rezulta produsaun BI lori prosesu naruk uitoan.
Jornalista: Natalino Costa
Editór: Xisto Freitas da Piedade
