DILI, 17 Fevereiru 2025 (TATOLI) – Prezidente Bee Timor-Leste (BTL), Gustavo da Cruz, apela ba populasaun iha Dili no munisípiu ne’ebé utiliza metru kontadór bee tenke selu tarifa.
“Husu ba komunidade ne’ebé monta ona kontadór bee tenke selu tarifa, maibé la selu mak ami-nia ekipa tun hetan, sei dezliga tiha bee ba imi. Hau-nia mandatu ida-ne’e sei la halimar ka tolera ba komunidade ne’ebé gosta dada ilegál no la selu tarifa”, Gustavo da Cruz dehan ba Tatoli iha Faról.
Prezidente ne’e hateten relasiona ho distribuisaun bee-moos ba komunidade, daudaun BTL halo ezersísiu kontínuo ba halo melloramentu ba sistema bee iha terrenu hanesan iha Kulau-Bekora nian ne’ebé antes ne’e sistema lala’o di’ak, ligasaun ilegál barak, maibé uma-kain kuaze 200-resin mak asesu ona bee-moos, tanba instala kedas ho kontadór bee.
Nia adianta katak ba uma-kain ne’ebé bee iha hela, maibé seidauk monta kontadór no kontadór monta ona maibé bee-moos seidauk la’o di’ak maka parte BTL sei kontinua halo aprosimasaun no melloramentu, nune’e sira mós bele kontribui ba selu tarifa.
“Objetivu selu tarifa ne’e la’ós atu selu kustu tomak husi BTL, maibé ida-ne’e oinsá hanorin komunidade iha konxiénsia utiliza bee, kuandu bee nakonu ona tenke taka, la taka tenke selu. Nune’e, komunidade balun ne’ebé presaun bee la to’o bele hetan hotu bee”, nia dehan.
Tanba ne’e, BTL tenta aselera prosesu sira ne’e hotu, nune’e fó resposta pozitiva ba konsumidór sira. “Ba sira ne’ebé lakohi kontribui ba Estadu maski ami halo ona melloramentu maka sei dezliga sira-nia ligasaun. Hahú semana ne’e ami aplika iha Hera, Mota-Ki’ik, tanba tinan barak bee la’o normál tiha, maibé lakohi selu tarifa mak ami sei hakotu. Ida-ne’e ami sei la halimar ho komunidade”, Gustavo afirma.
Nia esplika katak iha projetu melloramentu bee-moos nian iha Dili, daudaun Ministériu Obra Públika mós halo hela melloramentu ba estrada iha sidade urbana, tanba ne’e BTL koloka kanu sira tuir nia fatin, nune’e komunidade labele halo destruisaun ba sistema ne’ebé BTL tau ona.
“Sistema ne’ebé ami tau ona mak komunidade estraga maka sei kriminaliza tuir lei ne’ebé iha. Daudaun ami kontinua halo sosializasaun ba komunidade hahú husi nasionál to’o munisípiu atu iha konxiénsia bele kontribui ba dezenvolvimentu ida-ne’e”, nia adianta.
Tuir dadus husi BTL, totál kondumidór ne’ebé asesu bee hamutuk rihun 32-resin – iha Dili rihun 17. Metru kontradór ne’ebé BTL instala ona maizumenus rihun 8-resin no númeru ne’e bele aumenta tanba kada loron kontinua halo melloramentu.
Nia subliña katak ba hirak ne’ebé la selu tarifa bee-moos sei desliga no atu selu hodi liga fali tenke halo tuir dekretu-lei númeru 4/2024 iha artigu 14 artigu alínea a). Tenke selu hotu fatura pagamentu ne’ebe durante la selu, b). Selu hikas ligasaun foun.
Ba komunidade ne’ebé sobu metru kontadór ka halo aat metru kontadór tenke selu hotu fatura pagamentu ne’ebé durante la selu, no selu multa pesoál $15, koletiva $300, prazu loron 10. Kuandu liu aumenta $4 ba pesoál no $100 ba koletiva.
Ba halo ligasaun ilegál iha selu multa pesoál $10, koletiva $150, prazu loron 10, bainhira liu aumenta $4 ba pesoál no $100 ba koletiva.
Ba sira ne’ebé uza bomba elétrika direta ba kanalizasaun públika tenke selu hotu fatura pagamentu neʼebé durante la selu, selu multa pesoál $10, koletiva $150, prazu foron 10, kuandu liu aumenta $4 ba pesoál no $100 ba koletiva.
Notísia relevante: BTL rekolla reseita millaun $1,6 iha tinan kotuk
Jornalista: Arminda Fonseca
Editora: Maria Auxiliadora
