DILI, 18 Fevereiru 2025 (TATOLI)—Diretór Jerál Sekretaria Estadu Formasaun Profisionál no Empregu (SEFOPE), Carlito Rosário Cabral, informa SEFOPE hein hela pedidu husi empreza sira iha Portugál kona-ba emprega timoroan sira.
Carlito Rosário Cabral hateten governu Timor-Leste ho Portugál asina ona akordu traballu iha tinan kotuk.
“Ita iha memorandu entre Portugál ho Timor-Leste. Maski nune’e, seidauk iha pedidu husi empreza sira iha Portugál katak sira presiza traballadór timoroan atu bá serbisu iha Portugál. Tanba ne’e, ita hein de’it pedidu referidu,” Carlito dehan ba Tatoli iha nia kna’ar fatin, Kaikoli, tersa ne’e.
Diretór jerál ne’e esplika katak karik iha pedidu no nesesidade ba traballadór iha área espesífika sira, SEFOPE iha hanoin atu prepara traballadór sira.
Notísia relevante:Timor-Leste no Portugal sei selebra akordu rua
“Ita hein de’it. Karik empreza husi Portugál presiza traballadór, ita sei prepara ema tuir sira-nia ezijénsia. To’o ohin loron, seidauk iha kompañia ida husi Portugál husu atu emprega ita-nia traballadór sira,” nia haktuir.
Bainhira husu kona-ba preparasaun SEFOPE nian, diretór ne’e hatán katak SEFOPE presiza hatene kritériu empregadór sira-nian, ezemplu traballadór sira tenke hatene lian portugés.
Antes ne’e, Governu Timor-Leste komprometidu atu selebra akordu rua entre nasaun rua, Timor-Leste no Portugál, kona-ba administrativu ba aplikasaun konvensaun no mobilidade traballadór timoroan nian.
“Konsellu Ministru delibera ona hodi autoriza asinatura akordu administrativu ba aplikasaun konvensaun entre Timor-Leste no Portugál kona-ba seguransa Sosiál no memorandu entendimentu entre Ministériu Traballu, Solidariedade Sosiál no Inkluzaun Portugál no Sekretaria Estadu Formasaun Profisionál no Empregu Timor-Leste,” Ministru Prezidénsia Konsellu Ministru, Agio Pereira, relata hafoin reuniaun ezekutivu, iha Palácio do Governo, foin lalais ne’e.
Akordu rua ne’e sei asina hosi Ministra Solidariedade Sosiál no Inkluzaun, Verónica das Dores no Sekretáriu Estadu Formasaun Profisionál no Empregu, Rogério Araújo Mendonça, durante vizita ofisiál bá Portugál.
Akordu dahuluk ho objetivu atu permite artikula no koloka ho vigór konvensaun seguransa sosiál, ne’ebé permite katak sidadaun Timor no portugés sira bele hetan benefísiu iha país rua, ho benefísiu seguransa sosiál ne’ebé hanesan hosi nasaun rua.
Akordu daruak ho objetivu atu fasilita no organiza ho forma institusionál entrada timoroan sira bá Portugál hodi buka serbisu.
Jornalista: Felicidade Ximenes
Editór: Xisto Freitas da Piedade
