DILI, 18 Fevereiru 2025 (TATOLI)—Embaixadora Nova Zelándia iha Timor-Leste, Helen Tunnah ho Sekretáriu Estadu Formasaun Profisionál no Empregu (SEFOPE), Rogério de Araújo Mendonça, diskute empregu ba traballadór timoroan sira iha Nova Zelándia.
Embaixadora ne’e dehan, objetivu husi diskusaun programa traballu ne’e atu komprende kona-ba sistema traballu iha Nova Zelándia no preparasaun Timor-Leste nian.
“Ami kontente atu habelar ami-nia programa servisu iha Timor-Leste. Ami iha-ne’e iha semana ida-ne’e atu ko’alia kona-ba sistema traballu no ami iha programa rua iha setór agrikultura no ortikultura iha Nova Zelándia,” Helen Tunnah informa ba jornalista sira iha Kaikoli, tersa ne’e.
Iha fatin hanesan, Sekretáriu Estadu Formasaun Profisionál no Empregu, Rogério de Araújo Mendonça, husu ba joven sira ne’ebé prepara atu partisipa iha sentru formasaun sira atu partisipa iha programa servisu iha Nova Zelándia.
Notísia relevante: SEFOPE koordena ho Governu Nova Zelandia haruka traballadór timoroan serbisu iha nasaun ne’e
“Padraun Governu Nova Zelándia no Austrália hanesan, tanba ne’e ha’u garante katak ho asina memorandu iha tinan ne’e atu implementa programa traballu. Esperansa boot liu mak joven sira tenke envolve iha formasaun ba ezijénsia merkadu nian,” Rogério espera.
Entretantu, Diretór Jerál Sekretaria Estadu Formasaun Profisionál no Empregu (SEFOPE), Carlito Rosário Cabral, garante katak baze ba ezijénsia ba obra ne’e mak lian Inglés no SEFOPE iha rekursu ida-ne’e hodi responde ba ezijénsia ba programa servisu bá iha Nova Zelándia.
“Ami halo hela diskusaun téknika ho embaixada no sei haree liubá kritériu Nova Zelándia nian hodi ajusta ami-nia kandidatu sira,” Carlito dehan.
Nia relata, SEFOPE iha dadus kona-ba traballadór formadu lian Inglés hamutuk 50.000 iha baze dadus, nune’e SEFOPE sei fó oportunidade ba traballadór formadu iha programa traballu Nova Zelándia nian.
“Ita iha dadus husi tinan kotuk, entaun ita iha posibilidade atu fó oportunidade ba kandidatu 50.000 ne’e bá Nova Zelandia,” nia konklui.
Jornalista: Felicidade Ximenes
Editór: Xisto Freitas da Piedade
