DILI, 18 Fevereiru 2025 (TATOLI)—Sekretáriu Estadu Komunikasaun Sosiál, Expedito Loro Dias Ximenes husu ba mídia nasionál sira hanesan Rádiu Televizaun Timor-Leste (RTTL) no mídia sira seluk atu halo tranzmisaun ba tinan bodas de prata Polísia Nasionál Timor-Leste (PNTL).
Nia dehan, aniversária ezisténsia PNTL sei hala’o iha 27 Marsu 2025, nu’udár tinan bodas de prata tanba ne’e presiza tranzmite nune’e povu bele akompaña susesu no defaziu ne’ebé Polísia Nasionál Timor-Leste enfrenta durante tinan 25 hodi garante seguransa ba povu no nasaun.
“Ha’u husu ba mídia nasionál sira hotu atu apoiu tranzmite,” Expedito hateten ba jornalista sira bainhira ramata enkontru ho Komandante Jerál PNTL, Komisáriu Jerál Henrique da Costa no Segundu Komandante Jerál PNTL, Pedro Belo, iha Kuartél Jerál PNTL, Kaikoli, tersa ne’e.
Nia garante mídia hotu sei tranzmite aniversária PNTL ba dala 25 hodi povu akompaña dezempeñu servisu durante tinan 25 nia laran.
Iha fatin hanesan, Komandante Jerál PNTL, Komisáriu Jerál Polísia Henrique da Costa, hateten mídia nia papél importante tebes tanba tranzmite ona PNTL nia servisu durante tinan 25 bá povu hodi akompaña.
“Ita husu Sekretáriu Estadu Komunikasaun Sosiál bele tulun ita iha eventu komemorasaun ezisténsia PNTL ba dala 25 ne’e, nune’e mídia sira bele tranzmite mensajen ba públiku atu hatene no ita husu para atualiza atividade hotu ne’ebé polísia sira halo iha munisípiu to’o iha nasionál,” nia afirma.
Nia haktuir, durante tinan 25 ne’e, komunidade bele akompaña atividade hotu ne’ebé PNTL halo iha munisípiu to’o nasionál, iha buat ne’ebé mak di’ak no ladi’ak komunidade sira bele halo krítika para hadi’a, tanba prezensa PNTL ne’e atu serbí komunidade.
Jornalista: Natalino Costa
Editór: Xisto Freitas da Piedade
