Oknum PNTL suspeita ba kazu agresaun fízika hasoru sidadaun feto

DILI, 19 Fevereiru 2025 (TATOLI)—Oknum Polísia Nasionál Timor-Leste (PNTL) ho inisiál IdS suspeita ba kazu agresaun fízika hasoru sidadaun feto ida iha munisípiu Manatutu.
Suspeitu IdS ho deviza sarjentu, nu’udár membru PNTL ativu ne’ebé agora daudaun hala’o hela kna’ar hanesan Komandante Forsa Rezerva (Taskforce) iha munisípiu Manatutu.
Tuir kronolojia akontesimentu, sarjentu IdS la’ós pratika agresaun mesak maibé hamutuk ho nia espoza no nia oan iha vítima nia kós, iha suku Ma’abat, Manatutu Vila, tersa (18/2/2025), maizumenus tuku 23:25 Otl, rezulta vítima nia kondisaun to’o grave iha parte kabaas no isin-lolon.
Nune’e, iha kuarta (19/2/2025), vítima hato’o keixa ba Departamentu Investigasaun Kriminál Nasionál husi Komandu Jerál PNTL, Kaikoli, hodi halo investigasaun ba atu referida.
“Kazu ne’e, Polísia Nasionál Timor-Leste liuhusi Departamentu Investigasaun Kriminál Nasionál rejista kedas ho Númeru Úniku Kriminál: 0055/25 PNSIC ho tipu kazu ofensa grave,” sita husi Númeru Úniku Kriminál ne’ebé Tatoli asesu, kuarta ne’e.
Entretantu, bainhira jornalista Tatoli konfirma bá parte Departamentu Investigasaun Kriminál Nasionál kona-ba motivu husi kazu ne’e, maibé parte relevante la fó komentáriu tanba kazu ne’e sei iha hela prosesu identifikasaun.
Jornalista: Natalino Costa
Editór: Xisto Freitas da Piedade

