DILI, 21 Fevereiru 2025 (TATOLI)—Komisáriu Komisaun Antí Korrupsaun, Rui Pereira dos Santos, lansa ba públiku Planu Estratéjiku Komisaun Antí Korrupsaun (PECAC-sigla portuges) 2026-2030 atu reforsa serbisu CAC nian nu’udár órgaun espesializadu ba kombate korrupasaun.
“Lansamentu PECAC ne’e nia objetivu atu ajusta ba planu asaun anuál CAC tinan lima nian atu nune’e labele haketak malu. Komisaun Antí Korrupasaun atu halo saida, PECAC ne’e mak regula,” Rui hateten iha nia intervensaun durante serimónia aniversária CAC ba dala 15 ne’ebé hala’o iha edifisiu CAC, Faról, Dili, sesta ne’e.
Iha biban ne’e, Ministru Justisa, Sergio Hornai hateten Komisaun Antí Korrupasaun introdús Planu Estratéjiku foun ba Komisaun Antí Korrupsaun, ida-ne’e atu fanun no hakbiit liután CAC nian ezisténsia hodi hametin misaun no vizaun CAC nian iha área temátika importante rua hanesan prevensaun no investigasaun.
“Serbisu lubuk ida ita la’o tiha ona, maibé ho Palnu Estratéjiku Komisaun Antí Korrupsaun ida-ne’e bele fanun no hakbiit liután CAC nia ezisténsia hodi hametin misaun no vizaun CAC ba prevensaun no investigasaun,” nia subliña.
Governante ne’e husu ba CAC kontinua halo serbisu ba bens no interese públiku nian.
“Presiza konsolidadu ka halo nafatin. Informasaun halo nafatin no nafatin artikulasaun deklarasaun rendimentu bens no interese públiku, nune’e bele sai benefisiu bá interese komún hodi hametin responsabilidade no integridade CAC nian,” nia konklui.
Jornalista: Natalino Costa
Editór: Xisto Freitas da Piedade
