DILI, 21 Fevereiru 2025 (TATOLI)—Komisáriu Komisaun Antí Korrupasaun (CAC-sigla portugés), Rui Pereira dos Santos, hateten nia hatuun ona despaxu hodi orienta membru investigadór CAC atu dezloka bá munisípiu Kovalima investiga kazu falsifikasaun dokumentu veteranu ne’ebé komete husi FDS.
“Prosesu la’o hela. Agora, polísia sira la’o uluk ona depois ami sei la’o tuir. Ami tau iha planu ona. Parese fulan ida-ne’e ka fulan oin ne’e ekipa sei bá ne’ebá. Tanba, despaxu komisáriu iha tiha ona. Ami halo tiha ona diskusaun. Hein de’it atu bá,” Rui Pereira ba jornalista sira hafoin serimónia aniversária Komisaun Antí Korrupasaun ba dala 15 ne’ebé hala’o iha edifísiu CAC, Faról, Dili, sesta ne’e.
Nia dehan, maski Polísia Nasionál Timor-Leste halo ona nia serbisu ba kazu ne’e iha Kovalima (Suai) maibé Komisaun Antí Korrupsaun nafatin halo investigasaun liga ba karik ema ne’e hetan buat ruma ka benefísiu ruma hanesan subornu, CAC atu bá haree ida-ne’e.
“Falsifikasaun dokumenu ba veteranu ne’e krime. Maibé, kuandu krime seluk hanesan bá bosok ema ne’e krime komún. Ne’e polísia nia serbisu.Tanba ne’e mak ami husu ba polísia sira halo serbisu lai. Ami hein koordena de’it dadus ne’ebé sira hetan nune’e ami bele kontinua,” nia dehan.
Rui hatutan, CAC mós sei investiga sasin sira ne’ebé mak sai vítima hamutuk na’in sanulu resin ba kazu ne’e.
Notísia relevante: PNTL halo buska domisiliáriu patrimóniu FDS iha nia rezidénsia Kovalima
“Ita sei halo prosesu iha-ne’ebá no sira ne’ebé mak ita presiza hanesan asumi responsablidade ita notifika tenke mai Dili,” nia afirma.
Komisáriu ne’e esklarese katak durante nia mandatu hanesan komisáriu CAC, sei serbisu ho imparsialidade.
“Komisáriu mai tur iha-ne’e nu’udár komisáriu ba instituisaun ida-ne’e. Instuisaun Estadu nian. La serbisu ba kór A ka kór B no C. Tanba, ita-boot sira haree ona lei foun númeru: 1/2024 ne’e katak se komisáriu la kumpri ba lei inan no lei oan sira-ne’e, Parlamentu Nasionál bele impechement ka demite komisáriu,” nia esplika.
Rui hateten, hanesan komisáriu, ema nia keixa mai mós labele tau iha gaveta okos. “Keixa maka mai, despaxu tun ba unidade ne’ebé mak iha kompeténsia atu prosesa. La arkivadu. Laiha podér arkivamentu. Prosesu hotu-hotu mai iha-ne’e, ita prosesa, ita lori bá leten,” nia konklui.
Rekorda fali katak iha loron 19 Fevereiru 2025, Polísia Nasionál Timor-Leste (PNTL) liuhusi Departamentu Investigasaun Nasionál (DIK) dezloka bá munisípiu Kovalima hodi ezekuta mandadu judisiáriu husi Tribunál ho NUC: 0037/25/PNSIC hodi halo apreensaun buska domisiliária ba suspeitu FDS nia rezidénsia iha Suai (Kovalima).
Iha apreensaun buska domisiliária ba suspeitu FDS nia rezidénsia, iha Suai, DIK konsege halo apreensaun ba suspeitu nia patrimóniu hanesan karreta, tais-mane hamutuk 28, tais-feto 14, osan-mean, konta bankária BNCTL tolu no osan ho montante $70.
Jornalista: Natalino Costa
Editór: Xisto Freitas da Piedade
