BAUKAU, 20 Fevereiru 2025 (TATOLI)—Estrada rurál iha munisípiu Baukau hamutuk kilómetru 262 ho kondisaun seidauk reabilitadu.
Diretór Serbisu Munisipál Obra Públika (SMOP) Baukau, Agostinho Ximenes, esplika husi númeru estrada rurál hirak-ne’e lokalizada iha postu administrativu ualu husi suku 61 iha munisípiu Baukau ne’ebé kuaze maioria kondisaun aat.
“Tuir planu mestre ne’ebé uluk halo no ajuda husi parseiru internasionál sira hamutuk hotu 474 resin no reabilita ona kilómetru 212,” Diretór Serbisu Munisipál Obra Públika Baukau informa ba TATOLI iha ninia kna’ar fatin, Vila Nova, Baukau, kinta ne’e.
Nia salienta, Obra Públika Baukau kada tinan sempre aloka orsamentu hodi reabilita estrada rurál ne’ebé kategoriza estraga grave, nune’e iha tinan 2024 kontinua implementa projetu estrada pakote neen ho tótal kilómetru 12,5.
Enkuantu, iha tinan 2025, laiha orsamentu nune’e Obra Públika Baukau solisita ba governu sentrál liuhosi Ministériu Obra Públika (MOP) atu konsidera fali preokupasaun komunidade iha programa orsamentu tinan 2026.
Notísia relevante: Reabilitasaun estrada urbana Baukau Vila iha faze finaliza dezeña
“Dadus ita rekolla ona. Ita hatama ona hamutuk pakote 50 resin no governu sentrál mak sei deside. Ita munisípiu akompaña de’it,” Agostinho Ximenes haktuir.
SMOP Baukau identifika estrada rurál ligasaun entre postu ho postu, postu bá suku no suku bá aldeia ne’ebé kondisaun grave lokalizadu iha suku Uaigae (Vemasse) bá Uaimori (postu Ossú), husi suku Makalaku (postu Kelikai) bá suku Maluru (postu Matebian).
Tótal estrada rurál iha munisípiu Baukau hamutuk kilómetru 474 kompostu husi kilómetru 212 resin mak reabilitadu ona no 262 mak presiza atensaun hosi governu.
Jornalista : Natalino Belo
Editór : Xisto Freitas da Piedade
