DILI, 21 Fevereiru 2025 (TATOLI)—Iha fulan-Abríl tinan ne’e, Sekretaria Estadu Formasaun Profisionál no Empregu (SEFOPE) hamutuk ho Governu Nova Zelándia sei asina nota entendimentu ( MOU) kona-ba programa laborál hodi haruka joven timoroan sira bá servisu iha Nova Zelándia.
“Ohin ami enkontru ho Embaixadora Nova Zelándia ho nia ekipa katak rezultadu ne’e pozitivu tebes. Husi diskusaun ne’e, ami sei bá iha Nova Zelándia iha 28 Abríl 2025 hodi asina MOU entre nasaun rua, nune’e ita bele prepara ita-nia joven sira hodi bá servisu iha ne’ebá,” Sekretáriu Estadu Formasaun Profisionál no Empregu, Rogério de Araújo Mendonça, informa ba jornalista sira, hafoin enkontru ho Embaixadora Nova Zelándia iha salaun SEFOPE, Kaikoli, sesta ne’e.
Nia haktuir, iha enkontru ne’e, Embaixadora Nova Zelándia sita katak iha faze dahuluk ne’e sei prepara joven sira hamutuk 50 hodi serbisu iha-ne’ebá.
Notísia relevante: SEFOPE koordena ho Governu Nova Zelandia haruka traballadór timoroan serbisu iha nasaun ne’e
Nia esklarese, iha parte Embaixadora Nova Zelándia adianta katak sira tetu ho razaun balun ne’ebé mak atu simu joven sira atu bá servisu iha Nova Zelándia. Dahuluk, sira liga ho istória TL nian iha tinan 1999, iha-ne’ebé forsa Nova Zelándia hola parte iha prosesu sira-ne’e hodi mai defende TL, entaun sira haree katak pasu sira hanesan ne’e sira hakarak servisu hamutuk nafatin ho Governu TL liuliu hakbiit joven sira.
“Tanba ne’e, ha’u atu hato’o ba públiku katak husi rezumu ida-ne’e, parte Nova Zelándia hato’o ona bemvindu ba TL. Signifika katak sira prontu ona atu simu joven TL,” governante ne’e haktuir.
Iha fatin hanesan, Embaixadora Nova Zelándia, Helen Tunnah, agradese ba SEFOPE no nia ofisiál sira hotu ba enkontru sira ne’ebé hala’o iha semana ida-ne’ebé sai pozitivu no informativu tebes.
“Ha’u hanoin katak ita sei serbisu hamutuk ho di’ak tebes kona-ba mobilidade traballu. Ami-nia pasu tuirmai sei konvida ekipa husi SEFOPE bá vizita Nova Zelándia hodi haree ami-nia sistema no atu hasoru-malu ho ami-nia empregadór balun. Ami hakarak atu hahú programa iha tinan ida-ne’e nia rohan,” Helen Tunnah konklui.
Jornalista: Felicidade Ximenes
Editór: Xisto Freitas da Piedade
