DILI, 24 Fevereiru 2025 (TATOLI)-Ministériu Edukasaun (ME) liuhusi Institutu Nasionál Formasaun Dosente no Profesionál Edukasaun (INFORDEPE) kapasita dirijente eskola hamutuk 107 kona-ba administrasaun no jestaun eskolár.
Ministra Edukasaun, Dulce de Jesus Soares, hateten formasaun ba administrasaun no jestaun eskolár ba dirijente eskola sira, tanba servisu iha Ministériu Edukasaun ne’e la’os atu hanorin de’it, maibé presiza iha líder ida-ne’ebé oinsá jere eskola referida.
“Ema ne’ebé lidera eskola ne’e, presiza iha koñesimentu ba administrasaun no jestaun, atu bele hatene jere no halo inventarizasaun ekipamentu eskola sira, jestaun ba livru sira ne’ebé simu husi Ministériu Edukasaun no mós fahe oráriu ba profesór matéria sira, atu bele hanorin ho di’ak liután”, dehan Ministra Edukasaun iha salaun INFORDEPE Balide, segunda ne’e.
Ministra hatutan, kuandu formasaun termina, Ministériu Edukasaun sei kontinua tun ba terrenu hodi halo supervizaun atu buka hatene katak, matéria ne’ebé simu ne’e implementa kalae, karik la implementa dezafiu saida mak halo, tanba iha formasaun ne’e iha mós módul no matéria oioin atu ajuda sira hodi implementa administrasaun no jestaun eskolár ho di’ak liután.
Prezidente INFORDEPE, Domingos Martins, hatete importante kapasita formasaun referida ba direjente eskola, nune’e bele hanorin estudante ho di’ak liután iha saladeaula.
“Formasaun ohin ne’e ba dirijente eskola sira liliu ba Dili nian, ne’ebé direjente eskola ne’ebé tuir formasaun ne’e hamutuk 107”, dehan Prezidente INFORDEPE, Domingos Martins.
Nia dehan formasaun ne’e ho objetivu atu hasa’e kualidade dirijente sira, oinsá sira jere sira nia eskola. Formasaun ne’e hahú ohin sei termina iha sábadu.
Nia dehan ida-ne’e ba munisípiu hotu-hotu. Agora tama ona ba munisipiu 5 mak hanesan Aileu, Ainaru, Baukau, Oekusi no Dili. Formasaun ba dirinje eskola sira husi koordenadór Pre-eskolár, Diretór no adjuntu Ensinu Báziku, koordenadór EBF sira no Diretór no adjuntu Ensinu Sekundáriu Jerál no Tékniku Vokasionál. Munisípiu seluk sei simu mós formasaun ne’e hanesan ba sira.
Notísia relevante: ME oferese formasaun ba profesór Ensinu Báziku no Sekundáriu
Jornalista : Osória Marques
Editora : Rita Almeida
