DILI, 25 Fevereiru (TATOLI) – Komisaun Téknika Akompañamentu (CTA, sigla portugés) husi Organizasaun Komunidade País ko’alia Língua Portugueza (CPLP, sigla portugés) hasoru malu ho Ministériu Transporte no Komunikasaun hodi ko’alia kona-ba asuntu transporte, aéreu no telekomunikasaun nian.
Sekretáriu Estadu Arte no Kultura, Jorge Soares Cristovão, hateten enkontru ne’e nu’udar ajenda husi CTA ba apoiu Jogu CPLP nian no sira halo hotu enkontru ho ministériu relevante sira hafoin CTA halo fali relatóriu ba Estadu-Membru sira no Ministériu Juventude, Desportu, Arte no Kultura (MJDAK) no Sekretariadu CPLP, katak Timor-Leste nia preparasaun ne’e to’o ona iha ne’ebé.
Sorumutu ne’e, parte CTA no MTK fahe hanoin ba malu katak Ministériu Transporte no Komunikasaun nu’udar instituisaun ida ne’ebé sei koordena serbisu, liuliu iha parte aérea no telekomunikasaun ba internét nian.
Tanba haree ba delegasaun barak ne’ebé sei mai Timor-Leste, governante ne’e adianta katak iha diskusaun ho CTA ne’e importante mak Timor-Leste tenke hatene planu vou husi Estadu-Membru sira ne’ebé atu mai, tanba husi planu sasemok ne’e mak Governu bele halo fali aprosimasaun ho kompañia aérea sira.
“CTA sira-nia preokupasaun uitoan mak kona-ba fornesimentu liña internét ba iha otél sira durante eventu ne’e la’o no ita mós ko’alia kona-ba fornese informasaun ba internasionál. Planu iha ona no koordena ona ho Ministériu Transporte no Komunikasaun oinsá mak atu estabelese sentru mídia”, dehan.
Nia esplika husi estabelesimentu sentru mídia ne’e mak MTK sei haree oinsá mak bele fornese internét ho kapasidade di’ak hodi órgaun komunikasaun sira bele fó sai informasaun ba li’ur.
“Atu dehan de’it katak teknikamente serbisu sei la’o. Ohin ekipa CTA mai para atu rona diretamente aviaun saida mak sei mai iha ne’e tuir kapasidade aeroportu nian”, realsa.
Iha fatin hanesan Diretór-Jerál MTK, Constantino Perreira Soares, hateten ministériu sei fó apoiu tomak ba eventu jogu ne’ebé sei halo iha fulan-Jullu. “Sei iha reuniaun koordenasaun nivel tékniku mak ami sei halo preparativu akordu ho nesesidade rezultadu ekontru ne’ebé ohin ita halo ne’e”, nia hatutan.
Notísia relevante: Jogu CPLP: membru CTA no diretór CPLP sira vizita Timor-Leste
Jornalista: Arminda Fonseca
Editora: Maria Auxiliadora
