DILI, 25 Fevereiru 2025 (TATOLI)—Ekipa konjunta kompostu husi Servisu Informasaun Sekreta (UIS), Unidade Investigasaun Antí Korrupsaun iha Komisaun Antí Korrupasaun (CAC-sigla portugés) no Polísia Nasionál Timor-Leste liuhusi Departamentu Investigasaun Kriminál (DIK), halo buska no apreensaun ba Servisu Rejistu Verifikasaun Emprezariál, Institutu Públiku (SERVE, I.P), iha Matadouro, Dili, tersa ne’e.
Iha buska ne’e, ekipa konjunta bolu obrigatoriamente dirijente SERVE, I.P na’in-ualu hodi mai presta deklarasaun no tuir prosesu identifikasaun iha edifisiu CAC, Faról, Dili, no apreende mós dokumentu importante balun, durante oras balun nian laran tuir Lei Kódigu Prosesu Penál Artigu 53.
Entre dirijente SERVE na’in-ualu ne’e, na’in-lima ekipa konjunta bolu iha parte dadeer tuku 09:00 Otl no na’in -tolu seluk ekipa konjunta foti obrigatóriu iha parte loraik tuku 14:00 Otl, iha sira-nia servisu fatin.
Diretór Servisu Informasaun Sekreta (UIS), Euclides Madeira, ne’ebé lidera ekipa ne’e hateten entre dirijente SERVE na’in-ualu ne’ebé kaer kargu importante iha SERVE, I.P, na’in-ida servisu iha SERVE Munisípiu Baucau.
“Prosesu identifikasaun sei hala’o durante oras 12 nian laran. Se durante prosesu identifikasaun mak iha evidénsia sufisiente, ekipa sei husu bá Ministériu Públiku no Prokuradór Titulár hodi hasai mandadu detensaun. Se faktu ka evidénsia la to’o tuir Lei Kódigu Prosesu Penál mak investigadór hakarak ka lakohi tenke liberta hodi tuir fali prosesu normál,” Euclides Madeira hateten ba jornalista sira iha edifísiu CAC.
Iha fatin hanesan, Komisáriu CAC, Rui Pereira dos Santos, informa atividade buska ne’e liga ho informasaun balun ne’ebé akontese iha SERVE IP.
“Atividade buska halo tanba iha ligasaun ho kazu ne’ebé mak Komisaun Antí Korupsaun halo hela prosesu investigasaun. Buska hala’o husi Unidade Informasaun Seguransa CAC, iha Diresaun Investigasaun Kriminál nian,” nia esklarese.
Nia esplika, iha SERVE, informasaun balun espallada no husi maluk sira ne’ebé hato’o keixa, no informasaun ne’ebé CAC rasik ho inisiativa rekolla, katak Diretór Ezekutivu SERVE ho nia ema sira halo buat ruma laloos iha-ne’ebá.
“Kazu ne’e liga ho informasaun ne’ebé akontese ka espalla iha públiku kona-ba Diretór Ezekutivu SERVE ho nia ema sira. Iha identifikasaun ne’e bolu sira ne’ebé sente sai responsabilidade ba kazu ne’ebé mak atu halo prosesu mak hanesan Diretór Ezekutivu SERVE ho nia adjunta no mós funsionáriu relevante ne’ebé presiza atu halo identifikasaun tuir lei dentru oras 12 nia laran,” nia afirma.
Nia dehan CAC seidauk detein ema ida, tanba tuir Kódigu Prosesu Penál katak atu detein ema ruma, banhira ema halo krime foun, halai no halakon prova.
“Ohin ne’e, ita halo identifikasaun liga ho kazu ne’ebé mak iha alegasaun hasoru sira. Iha video ne’ebé virál iha rede sosiál, deskonfia buat ruma laloos iha-ne’ebá, liuliu prosesu rekrutamentu ema no balun halo kobransa ilegál,” nia hateten.
Rui dehan ekipa konjunta halo apreensaun ba dokumentu liga ho servisu nian, la presiza mandadu husi Tribunál.
“Se sira la koopera, ekipa sei halo pedidu ba Ministériu Públiku no Tribunál hodi husu autorizasaun para bele halo apreensaun dokumentu iha fatin servisu,” nia informa.
Antes ne’e, mosu problema entre dirijente sira iha SERVE, iha-ne’ebé entre sira akuza malu katak halo kobransa ilegál ba funsionáriu sira, rekrutamentu funsionáriu la tuir lei Komisaun Funsaun Públika no mós informasaun espallada iha rede sosiál katak akontese abuzu podér no nepotizmu iha SERVE, I.P.
Jornalista: Natalino Costa
Editór: Xisto Freitas da Piedade
