DILI, 25 Fevereiru 2025 (TATOLI)—Embaixada Xina ba Timor-Leste apresia servisu Polísia Nasionál Timor-Leste (PNTL) durante 2024 tanba garante movimentu xinés iha Timor-Leste ho livre no seguru.
“Embaixada Xina, Empreza Xineza no Asosiasaun Xineza louva servisu ida-ne’ebé maka’as no di’ak PNTL ninian durante tinan ida liubá,” Embaixadora Xina ba Timor-Leste, Wang Wenli, hateten ba jornalista sira hafoin reuniaun tripartida entre Embaixada Xina, Komandu PNTL inklui Asosiasaun Emprezária Xina iha Timor-Leste ba daruak ne’ebé halo iha Embaixada Xina, Dili, tersa ne’e.
Diplomata ne’e realiza enkontru tripartida daruak ho objetivu atu kontinua intensifika komunikasaun no atualiza situasaun atuál iha Timor-Leste hodi kontinua proteje mobilidade xineza iha Timor-Leste.
Wang husu ba Polísia Nasionál Timor-Leste kontinua mantein servisu di’ak ida-ne’e hodi fó segurasa ne’ebé di’ak ba sidadaun sira, nune’e bá-oin Embaixada Xina promove Timor-Leste hodi dada investidór Xina mai investe iha Timor-Leste.
“Ita-nia seguransa di’ak ona. Ida-ne’e hanesan fatór ida-ne’ebé importante hodi ita atrai investidór husi Xina hodi iha futuru mai halo investimentu iha Timor-Leste,” nia adianta.
Diplomata ne’e husu ba autoridade polísia bá-oin kontinua ajuda xineza iha Timor-Leste entermu proteje direitu legál tanba embaixada ho staff sira hotu-hotu sente seguru bainhira sira servisu no halo negósiu iha Timor-Leste iha tempu loron no tempu kalan.
Iha fatin hanesan, Komandante Jerál Polísia Nasionál Timor-Leste(PNTL), Komisáriu Jerál Polísia Henrique da Costa, hateten ema atu investe iha Timor-Leste dahuluk hakarak haree parte seguransa ninian oinsá, entaun liuhusi biban ida ohin ne’e fahe informasaun ba Embaixadora Xina ho nia ekipa atu hatene.
Komisáriu ne’e dehan, liuhusi enkontru ne’e, Komandu mós atualiza ba Embaixadora Xina kona-ba situasaun alargamentu estrada ne’ebé daudaun ne’e la’o hela.
“Ita hatene katak sira (xineza) barak mak loke plaza iha-ne’e no loja boot-boot, tan ne’e ita rekomenda para futuru kuandu iha alargamentu estrada, sira tenke koopera nune’e labele hetan sobu,” nia haktuir.
Komandante Jerál ne’e tenik katak daudaun ne’e Komandu PNTL instala ona sentru kontatu iha munisípiu hotu, tan ne’e kuandu xineza iha nasionál to’o munsípiu hetan difikuldade bele kontatu nune’e polísia bele halo intervensaun.
Jornalista: Natalino Costa
Editór: Xisto Freitas da Piedade
