BAUKAU, 27 Fevereiru 2025 (TATOLI)–Konsellu Munisipál Kombatente Libertasaun Nasionál (CMCLN-sigla portugés) Baukau, kontinua simu kandidatu kombatente ne’ebé hato’o reklamasaun relasiona ho lista editál tinan 2009.
Prezidente CMCLN Baukau, Fernando Gusmão ‘Beredu’u’, esplika husi totál numéru ne’ebé publika ona, munisípiu Baukau submete ona faze dahuluk ho tótal reklamante na’in 1.500, nune’e kontinua fó oportunidade hodi submete reklamasaun tuir tempu ne’ebé definidu ona.
Notísia relevante: MAKLN simu ona reklamasaun lista editál husi munisípiu-11
“Husu atu sira (veteranu) bele mai hatama reklamasaun tanba tuir informasaun katak iha loron 15 marsu ne’e tenke relata ona bá nasionál,” Prezidente CMCLN Baukau hateten iha ninia kna’ar fatin, Vila Antiga, Baukau, kuarta (26/02).
Beredu’u subliña katak parte Konsellu Veteranu Baukau nafatin simu reklamasaun husi veteranu sira-ne’ebé halo kontestasaun relasaun ho durasaun tinan dedikasaun luta nian ne’ebé maioria kategoria iha grau 0-3 no 3-7.
Tuir dadus atúal, provizoriamente husi reklamante hamutuk 3.410 ne’e, faze dahuluk relata ona na’in 1.500 bá nasionál iha loron 14 Fevereiru liubá no tuir planu faze daruak nian sei relata tan iha loron 15 marsu.
“Agora, lista reklamadu ne’ebé seidauk submetidu hamutuk 1.910,” Beredu’u haktuir.
Aleinde ne’e, reklamante balun kestiona liuliu inan-aman sira-ne’ebé lakon vida maibé naran la sai, inklui formuláriu reklamasaun ba ema-ne’ebé naran anunsiada maibé la konsidera partisipa ba luta libertasaun pátria.
Antes ne’e, CMCLN Baukau hamutuk ho reklamante sira instala ona komisaun no prepara karta petisaun hodi envia bá Ministériu Asuntu Kombatente Libertasaun Nasionál (MAKLN) ho Prezidente CMCLN hodi buka solusaun dentru loron 90.
Entretantu, totál lista editál Kombatente Libertasaun tinan 2009 hosi munisípiu Baucau hamutuk rihun 12-resin kompostu husi mártrir 200-resin, inkapasitadu hamutuk 145 no na’in 1.500-resin mak konfirmadu sai benefisiáriu no restu kontinua halo reklamasaun.
Jornalista: Natalino Belo
Editór: Xisto Freitas da Piedade
