OMS entrega motorizada neen ba AIFAESA
DILI, 27 Fevereiru 2025 (TATOLI)—Organizasaun Mundiál Saúde iha Timor-Leste (OMS) apoia motorizada neen ba Autoridade Inspesaun no Monitorizasaun Atividade Alimentár, Sanitária no Ekonómika (AIFAESA) hodi fasilita AIFAESA nia atividade.
Reprezentante OMS iha Timor-Leste, Arvind Mathur, hateten apoiu ne’e ho objetivu atu ajuda servisu AIFAESA nian, tanba iha serbisu barak iha terenu.
“Ami hakarak fó apoiu ba AIFAESA, hanesan iha servisu ba kontrolu produtu ai-han husi armazein to’o distribuisaun produtu sira,” Arvind Mathur dehan ba jornalista sira iha Matadouru, Dili, kinta ne’e.
Iha fatin hanesan, Inspetora Autoridade Inspesaun no Monitorizasaun Atividade Alimentár, Sanitária no Ekonómika (AIFAESA), Odete Viegas, dehan AIFAESA halo kolaborasaun ho OMS hodi apoiu motorizada ida-ne’e atu hafásil servisu sira iha terenu.
“Ami iha kolaborasaun ho Organizasaun Mundiál Saúde, ami haree limitasaun transporte AIFAESA nian no ami husu apoiu hodi ajuda fiskalizadór sira iha terrenu hodibele halo inspesaun ba operadór ekonómiku sira. Sira hatene katak AIFAESA falta rekursu finanseiru, umanu no lojístiku, nune’e apoiu OMS nian ajuda tebes servisu AIFAESA nian,” Odete Viegas afirma.
Tuir Inspetora katak maski iha limitasaun rekursu maibé serbisu inspesaun ba saúde públika kontinua la’o iha terenu, tanba AIFAESA kopera ho OMS hodi apoiu sistema publisidade no dijitalizasaun.
“Apoiu ne’ebé iha sei ajuda fiskalizadór sira iha sira-nia serbisu aprezentasaun relatóriu terenu no ita sei hamenus utilizasaun surat-tahan hodi halo servisu sai efisiente liután,” nia konklui.
AIFAESA, I.P. aprovadu iha Reuniaun Konsellu Ministru, iha loron 24/05/2016 no promulgadu husi Prezidente Repúblika, iha loron 24/06/2016. Ninia misaun mak halo fiskalizasaun no prevensaun ba kumprimentu lejizlasaun ne’ebé regula ezersísiu atividade ekonomika sira, iha setór alimentár no la’ós alimentár, no mós halo avaliasaun no komunikasaun kona-ba risku iha kadeia alimentár.
Vizaun mak hanesan entidade referénsia ba defeza konsumidór sira no saúde públika no salvaguarda ba regra merkadu no livre konkorénsia.
Nia hala’o nia knaar tuir nia valor hanesan: 1) Integridade liuhusi onestidade no étika. 2) Kualidade liuhusi rigór no efisiénsia. 3) Kredibilidade liuhusi viabilidade no konfiansa. 4) Kompromisu liuhusi responsabilidade no entrega. 5) Independénsia liuhusi imparsialidade no transparénsia.
Jornalista: Felicidade Ximenes
Editór: Xisto Freitas da Piedade
