DILI, 27 Fevereiru 2025 (TATOLI)—Sidadaun ida ho inisiál AJ (49) hakotu iis iha otél Sunrise, Praia dos Coqueiros, Dili, kinta ne’e, tuku 13:00 Otl.
Sidadaun referida tama ba otél ho motorizada marka Vi-Ixion koor mean, tula feto ida. Dentru otél, derepente AJ laiha ona iis, nune’e traballadór otél bolu kedas otél na’in hodi kontatu ba polísia. La to’o minutu 30, Polísia Eskuadra Dom Aleixo lideradu husi Komandante Interinu, Inspetór Asistente Polísia, Domingos Pinto no Departamentu Investigasaun inklui Forénsiku Komandu Jerál Polísia Nasionál Timor-Leste to’o kedas iha fatin akontesimentu hodi asegura mate-isin referidu.
Tuir informasaun ne’ebé TATOLI rekolla iha fatin akontesimentu katak matebian AJ iha tinan kotuk sofre moras no halo tratamentu konsege di’ak ona maibé nia família sente hakfodak bainhira matebian hasoru dezastre ne’e.
Hafoin polísia halo tiha rekonstrusaun ba lokál akontesimentu, polísia falun kedas AJ nia mate-isin lori tula bá karreta forénsiku hodi submete ba autopsia iha Hospital Nacional Guido Valadares, akompañadu husi matebian nia oan rasik.
Polísia mós asegura feto ne’ebé mak matebian lori bá otél no na’in ba otél Sunrise, hodi submete bá investigasaun iha Komandu PNTL Munisípiu Dili, nune’e bele hatene kauza husi sidadaun ne’e nia mate.
Polísia mós asegura motór Vi-Ixion ne’ebé mak matebian uza sai hanesan evidénsia. Komandante Polísia Nasional Timor-Leste (PNTL) Munisipiu Dili, Superintendente Xefe Polísia Orlando Gomes ba TATOLi via telefone katak nia parte seidauk simu relatóriu kona-ba sidadaun ida mate iha otél Sunrise.
AJ nu’udár motorista ida-ne’ebé lori deputada ida nia veíkulu iha Parlamentu Nasionál.
Jornalista: Natalino Costa
Editór: Xisto Freitas da Piedade
