DILI, 28 Fevereiru 2025 (TATOLI)—Ministru Komérsiu no Indústria, Filipus Nino Pereira no Sekretáriu Jerál The Association of Southeast Asian Nations (ASEAN), Kao Kim Hourn, diskute Timor-Leste nia adezaun ba ASEAN iha nasaun Malázia.
Ministru Komérsiu no Indústria, Nino Pereira, hala’o enkontru bilaterál ho Sekretáriu Jerál ASEAN Kao Kim Hourn, iha ámbitu retiru Ministru Ekonómiku ASEAN ba dala 31 iha Dezaru, Johor, Malázia. Objetivu hosi enkontru ne’e atu troka hanoin kona-ba progresu adezaun Timor-Leste nian ba ASEAN, ho foku partikulár ba ninia integrasaun iha Komunidade Ekonómika ASEAN,” haktuir komunikadu husi Ministériu Komérsiu no Indústria ne’ebé TATOLI asesu, sesta ne’e.
Nino Pereira fornese atualizasaun ida kona-ba Timor-Leste nia progresu iha aliñamentu ho instrumentu jurídiku komunidade ekonómika ASEAN nian, hodi reafirma kompromisu Timor-Leste nian atu kumpri ezijénsia ekonómika ASEAN nian.
Notísia relevante: Ministru Nino partisipa retiru ekonomia ASEAN ba dala-31 iha Malázia
Nia hato’o agradesimentu ba asisténsia téknika ne’ebé kontinua no apoiu kapasitasaun husi Sekretariadu ASEAN no Estadu-membru ASEAN ne’ebé subliña nesesidade ba kooperasaun ne’ebé sustentável hodi garante integrasaun la’o ho di’ak iha bloku rejionál.
Nune’e, Sekretáriu Jerál Kao Kim Hour, rekoñese Timor-Leste nia progresu signifikativu ba adezaun tomak bá ASEAN no enkoraja ofisiál tékniku sira hosi Governu Timor-Leste atu partisipa ativamente iha enkontru sira ASEAN nian.
“Ida-ne’e importante atu Timor-Leste bele fornese ninia perspetiva sira kona-ba ajenda xave sira ne’ebé diskute iha ámbitu enkontru sira ASEAN nian,” Kao Kim subliña.
Sekretáriu Jerál hateten katak objetivu prinsipál ida hosi Retiru Ministru Ekonómiku ASEAN ba dala 31 mak atu ko’alia kona-ba Timor-Leste nia adezaun no nia integrasaun ekonómika.
Kao Kim Hour rekomenda ba Governu Timor-Leste atu envolve setór privadu iha prosesu adezaun, atu subliña papél setór privadu nian hodi hametin lasu ekonómiku sira iha ASEAN nia laran.
Nia reafirma mós kompromisu Sekretariadu ASEAN nian hodi apoia esforsu integrasaun Timor-Leste nian liuhosi inisiativa kapasitasaun.Tanba ne’e, Timor-Leste kontinua serbisu atu hetan adezaun tomak bá ASEAN, ho integrasaun ekonómika sai nafatin prioridade prinsipál iha nia asesu.
Ministru Nino Pereira ho nia delegasaun bá partisipa iha retiru referidu hosi loron 26 to’o 28 Fevereiru 2025.
“Retiru ida-ne’e hanesan reuniaun estatutária ASEAN nian, akontese iha ámbitu esforsu boot Timor-Leste hala’o atu integra iha organizasaun rejionál sira,” haktuir komunikadu imprensa husi Ministériu Komérsiu no Indústria ne’ebé TATOLI asesu, kuarta (26/02/2025).
Jornalista: Felicidade Ximenes
Editór: Xisto Freitas da Piedade
