DILI, 03 Marsu 2025 (TATOLI)—Tribunál Judisiál Primeira Instánsia Dili (TJPID), segunda ne’e, liuhusi juíz titulár José Escurial hatuun despaxu hodi aplika prizaun preventiva ba arguidu AdD tanba iha indísiu katak arguidu mak baku mate matebian Isaac Soares iha área Beduku, munisípiu Likisá, sesta (28/2/2025).
Iha prosesu interrogatóriu dahuluk, iha sala julgamentu Ministériu Públiku ne’ebé reprezenta husi prokuradór Renato Bere Nahak promove arguidu ho krime omesídiu agravadu ne’ebé previstu no punidu iha artigu 139 husi Kódigu Penál Timor-Leste.
Hafoin ramata interrogatóriu dahuluk, defeza husi arguidu AdD, advogadu privadu Fernando da Costa hateten nia kliente ne’e psikolojikamente normál, maibé tanba de’it vítima (matebian Isaac Soares) duun naokteen ba nia, tolok nia bá nia inan-aman no dehan ba patraun atu lalika selu nia osan, tanba ne’e mak arguidu nervu lori besi kesi argola nian ne’e baku ba nia liman no ulun hodi rezulta matebian Isaac mate.
“Arguidu nervu hodi foti besi argola ne’e baku dala rua, dala ida kona nia liman no ida kona ninia ulun. Ne’e mak afeta vítima mate,” Fernando hateten ba jornalista sira iha TJPID, Kaikoli, Dili.
Nia dehan, Tribunál deside aplika medida koasaun prizaun preventiva ba arguidu tanba hahalok arguidu nian ne’e iha inísiu krime tanba halo mate vítima.
“Maibé, iha alegasaun husu ba Tribunál atu aplika aprezentasaun periódika, maski arguidu iha duni indísiu ba krime ida-ne’e, maibé durante investigasaun husik aplika medida ida-ne’e ba arguidu nune’e arguidu iha li’ur hodi submete ba prosesu investigasaun. Más, Tribunál nia haree katak medida koasaun ne’ebé adekuada mak prizaun preventiva,” nia afirma.
Fernando hateten, sei rekursu ba desizaun Tribunál nian ne’e, maibé sei koordena ho família arguidu nian molok halo rekursu kontra desizaun Tribunál referidu.
Jornalista: Natalino Costa
Editór: Xisto Freitas da Piedade
