DILI, 04 Marsu 2025 (TATOLI)—Prezidente Tribunál Rekursu, Deolindo dos Santos, rekoñese edifísiu foun Tribunál Judisiál Primeira Instánsia (TJPID) iha tempu udan bee tama, tanba ne’e Tribunál Rekursu husu ona ba Ajénsia Nasionál Dezenvolvimetu (ADN) nune’e koordena ho empreza konstrutora China International Economic Corporation Group Co. Ltd atu haree filafila kondisaun obra referida.
“Akontese duni bee tama liuhusi janela, odamatan balun aat, parede balun iha sinál. Maibé, ha’u labele halo esplikasaun iha téknika. Ne’e tékniku sira mak bele esplika. Tanba ne’e, ami husu ona tékniku sira husi AND no Obra Públika prioridade atu fó solusaun,” Deolindo hateten ba jornalista iha TJPID, Kaikoli, tersa ne’e.
Nia dehan, kestaun sira-ne’e obrigasaun empreza nian atu haree ka hadi’a. “Ita seidauk halo pagamentu 100% ba empreza konstrutora ne’e. Pagamentu ba empreza hela millaun $1. Tanba ne’e, buat ki’ik sira-ne’e, se sira hadi’a mak foin bele simu pagamentu. Se la hadi’a regra iha hodi haree bá ida-ne’e,” Deolindo tenik.
Deolindo haktuir, empreza konstrutora China International Economic Corporation Group Co. Ltd hatene ona situasaun ne’e, tan ne’e iha tempu badak sei haree atu hadi’a.
Iha fatin hanesan, Juiza Administradora Tribunál Judisiál Primeira Instánsia Dili, Edite Palmira informa katak edifísiu ne’e ho sala julgamentu ki’ik 10 no sala julgamentu boot ida no ne’e sufisiente ona hodi hala’o kna’ar.
“Kona-ba edifísiu bee tama iha tempu udan, ami antes ne’e halo ona relatóriu atu husu empreza bele haree hodi hadi’a,” nia konklui.
Konstrusaun ba obra ne’e hahú iha Novembru 2020 no finaliza iha Dezembru 2025, gasta orsamentu jerál Estadu (OJE) liu millaun $10.
Jornalista: Natalino Costa
Editór: Xisto Freitas da Piedade
