DILI, 04 Marsu 2025 (TATOLI)—Tribunál Judisiál Primeira Instánsia Dili (TJPID), tersa ne’e, kotinua halo julgamentu ba krime omesídiu tentadu no krime arma branka ne’ebé envolve husi arguidu VP.
Iha julgamentu ne’e, Ministériu Públiku (MP) ne’ebé reprezenta husi prokuradora Benvinda do Rosário aprezenta nia alegasaun hodi solisita ba Tribunál koletiva atu aplika pena prizaun tinan ualu ba arguidu PV, tanba faktu provadu katak arguidu komete krime rua, kompostu krime omisídiu tentativu no krime arma branka.
Iha sala julgamentu, prokuradora Benvinda hateten arguidu VP sona duni lezadu JP ho tudik iha nia hirus-matan, nune’e to’o agora rezulta lezadu sei moras iha nia hirus-matan.
Prokuradora ne’e fundamenta katak iha prosesu julgamentu ba kazu ida-ne’e, arguidu deklara katak lezadu mak baku uluk arguidu nune’e arguidu ho nervozu sona lezadu.
Prokuradora ne’e dehan, maski nune’e, bazeia ba depoimentu ne’ebé aprezenta iha prosesu julgamentu, lezadu haktuir katak iha joga bola guling mak nia ho arguidu diskute malu nune’e ikusmai arguidu lori tudik sona iha lezadu nia hirus-matan. Tanba ne’e, Ministériu Públiku haree katak arguidu ho intensaun atu sona lezadu.
“Ho nune’e mak Ministériu Públiku laiha duvida, mantein ho akuzasaun ne’ebé iha, hodi husu Tribunál ida-ne’e atu aplika pena prizaun tinan ualu ba arguidu,” prokuradora Benvinda deklara iha sala julgamentu TJPID, Kaikoli.
Hatán ba alegasaun Ministériu Públiku nian ne’e, parte defeza husi arguidu VP, advogadu privadu Arlindo Sanches husu Tribunál atu tetu sirkunstánsia hotu atu aplika desizaun ida-ne’ebé justu ba arguidu.
Enkuantu, arguidu VP deklara ba Tribunál katak iha loron-segunda, 24 Fevereiru 2025 dadeersan, lezadu JP ba vizita arguidu VP iha prizaun Becora hodi husu osan ho montante $800 nune’e lezadu atu uza osan referida halo tratamentu ba nia saúde liuliu ninia hirus-matan ne’ebé to’o agora sei moras hela.
Nune’e mós, lezadu JP konfesa katak nia sente moras iha fuan, tanba suspeitu sona nia kona fuan, nune’e halo nia dada iis susar.
Hafoin rona tiha parte hotu, juíz José Escurial marka fali julgamentu ne’e ba loron 19 Marsu 2025, tuku 14:00 Otl, hodi foti desizaun.
Julgamentu prezidente husi juíz koletivu kompostu husi juíz José Escurial, Francisca Cabral no Afonso Carmona, entretantu Ministériu Públiku reprezenta husi prokuradora Benvinda no arguidu hetan asisténsia legál husi advogadu privadu, Arlindo Sanches.
Jornalista: Natalino Costa
Editór: Xisto Freitas da Piedade
