DILI, 05 Marsu 2025 (TATOLI)—“Misa ba prizioneiru sira importante tebes tanba Jesús dehan iha Evanjellu katak Ha’u mak dadur imi bá vizita Ha’u,” Núnsiu Apostoliku Vatikanu iha Timor-Leste, Monseñor Marco Sprizzi, hateten iha nia omília bainhira prezide misa Kuarta Sinza ho prizioneiru sira hamutuk 425 iha Prizaun Bekora, kuarta ne’e.
“Ha’u hanesan Padre, Jesús identifika nia aan iha ha’u. Tanba ha’u mak iha Jesús nia fatin. Jesús dehan Nia dadur hela, tanba ne’e mak Jesús iha ida-idak nia aan. Ida-ne’e hanesan vokasaun ida, tan ne’e ita ne’ebé hela iha fatin ne’e ita tenke mai vizita sira-ne’ebé iha-ne’e (prizioneiru),” nia haktuir tan.
Nia husu ba prizioneiru no sarani sira atu Kuarta Sinza ne’e nu’udár atu jejún oinsá sarani atu hadeer halo orasaun, jejún no izmola nune’e bele rekonsila aan ho Maromak.
“Dalan tolu ne’e ita idak-idak bele hala’o hodi ita bele rekonsila ita-nia aan iha ita-nia vida saida de’it, iha fatin ne’ebé de’it, iha ministériu ka iha sosiedade atu rekonsila ho Maromak,” nia konklui.
Prezide misa Kuarta Sinza nu’udár oportunidade da-ikus ba Monseñor Marco Sprizzi hodi prezide misa iha Timor tanba tempu besik bibi-atan ne’e sei termina ninia misaun hanesan reprezentante Amu Papa Francisco iha Timor.
Iha fatin hanesan, Ministru Justisa, Sergio Hornai, kongratula Núnsiu Apostóliku Vatikanu, Monseñor Marco Sprizzi durante halo kna’ar iha Timor-Leste.
Nia agradese ba Monseñor Marco Sprizzi tanba bele selebra misa hamutuk ho rekluzu sira no guarda prizineiru iha Prizaun Bekora.
“Ha’u lori Governu nia naran no Ministériu Justisa nia naran hakarak agradese ba Nunsiatura ba kolaborasaun ne’ebé estraordinária bainhira ultimamente iha vizita Santo Padre ninian mai Timor-Leste, iha-ne’ebé ita lori ita-nia maun-alin rekluzu na’in rua, reprezenta rekluzu sira bá partisipa misa solene iha Tasi-Tolu,” governante ne’e haktuir.
Jornalista: Natalino Costa
Editór: Xisto Freitas da Piedade
