DILI, 05 Marsu 2025 (TATOLI)—Ministru Justisa, Sergio Hornai, komprometidu sei prevee orsamentu hodi solusiona kapela Prizaun Bekora nune’e bele fasilita rekluzu sira atu reza.
Nia rekoñese daudaun ne’e kapela nia kondisaun aat ona, liuliu odamatan no kakuluk, nune’e fatin ba orasaun muda fali ona bá fatin sentru vokasionál ne’ebé lokaliza iha prizaun laran.
“Sentru vokasionál tuir loloos ita uza halo formasaun maibé komu ita-nia kapela kondisaun ladi’ak, entaun ita muda tiha ba fatin ne’e. Hakarak ka lakohi ita tenke fó solusaun ba problema ida-ne’e tanba kapela ne’e hanesan uma-mahon ida atubele hadi’a ema-nia fiar, hametin ema-nia esperansa no hametin ema-nia konfiansa nune’e ita sai husi fatin ne’e bá fatin seluk ita iha vizaun atu halo servisu,” Sergio hateten ba jornalista sira bainhira partisipa misa Kuarta Sinza iha kapela Prizaun Bekora, kuarta ne’e.
Hornai hateten, molok halo reabilitasaun ba kapela prizaun nian sei haruka tékniku sira halo levantamentu ba kondisaun kapela ne’e. Husi rezultadu levantamentu ne’e mak sei determina katak atu halo reabilitasaun ka konstrusaun foun.
Goverannte ne’e sei hein rezultadu levantamentu tékniku sira molok prevee orsamentu ba obra referida.
Jornalista: Natalino Costa
Editór: Xisto Freitas da Piedade
