DILI, 05 Marsu 2025 (TATOLI)—Ministru Justisa, Sergio Hornai hateten Ministériu Justisa (MJ) prosesa ona akizisaun farda ba rekluzu prizaun tolu (Dili, Gleno no Suai).
“Akizisaun farda ba rekluzu sira ba prizaun tolu iha hela faze ne’ebé sujeita ba aprovizionamentu,” Sergio dehan ba jornalista sira bainhira partisipa misa Kuarta Sinza iha kapela Prizaun Bekora, kuarta ne’e.
Hornai esklarese Governu la taka matan ba prizioneiru sira, maibé kontinua tau-matan ba sira-nia nesesidade sira.
“Ita mós sei kontinua tau-matan ba sira-nia presiza diária. Ha’u hanesan ministru no mós diretór responsável sira atu haree ida-ne’e. Labele iha interupsaun ba ne’e tanba liga kedas ba ema-nia nesesidade loron-loron ,” nia konklui.
Entretantu, proposta orsamentu jerál Estadu 2025 ba Ministériu Justisa hamutuk $12.876,049, alokadu ba saláriu vensimentu $8.082,102, bens no serbisu $4.328,716, kapitál menór rihun $200 no kapitál dezenvolvimentu $265,23.
Jornalista: Natalino Costa
Editór: Xisto Freitas da Piedade
