DILI, 05 Marsu 2025 (TATOLI)—Tribunál Judisiál Primeira Instánsia Dili (TJPID), tersa (04/3), kontinua halo julgamentu ba kazu sona membru F-FDTL ho inisiál FPdJA ne’ebé akontese iha Kuluhun de Baixo, postu administrativu Kristu-Rei, munisípiu Dili, iha 2022.
Lezadu FPdJA nu’udár membru FALINTIL-Forsa Defeza Timor-Leste (F-FDTL) husi Komponente Navál.
Iha sala julgamentu, lezadu FPdJA deklara katak arguidu ETF mak tuku nia to’o baixa ospitál. Nune’e, Polísia Militár sira mak buka tuir arguidu ETF hodi halo kapturasaun. Hafoin kaptura tiha arguidu, Polísia Militár informa ba lezadu katak ema ne’ebé sona nia (lezadu) kapturadu.
“Hahú husi ne’e mak ha’u foin hatene katak arguidu mak ne’e. Ho hahalok arguidu nian ne’e, ha’u baixa iha ospitál durante semana ida no kanek ne’ebé ha’u hetan suku iha pontu hitu,” lezadu FPdJA deklara iha sala julgamentu TJPID, Kaikoli.
Hafoin rona tiha lezadu nia depoimentu, Tribunál Koletivu marka fali julgamentu ne’e ba loron 25 Marsu 2025, tuku 14:00 Otl, hodi kontinua rona deklarasaun husi sasin sira-ne’ebé sai hanesan interveniente ba prosesu ne’e.
Rekorda fali katak tuir faktu ne’ebé aprezenta husi Ministériu Públiku, akontesimentu ne’e akontese iha loron 05 Marsu 2022, tuku 03:00 madrugada, iha Kuluhun de Baixo.
Iha momentu ne’ebá, lezadu ho nia kolega JM bá iha fatin akontesimentu hodi sosa tua sangaria hodi hemu halimar iha fatin refere. Nune’e, lezadu haree arguidu hakbesik mai lezadu nia meza, hodi husu tua ba lezadu. Maibé, lezadu ko’alia ba arguidu katak hakarak hemu tua tuur tiha mak hemu.
Lezadu nia kolega haruka arguidu hemu, lezadu hatán katak lalika obriga ema hemu. Arguidu la satisfáz hodi tolok hasoru lezadu ho liafuan mál. Nune’e, arguidu hasai rama ambon iha pasta laran hodi sona iha lezadu nia oin.
Konsekuénsia husi arguidu nia hahalok ne’e, halo lezadu hetan kanek iha isin-lolon. Tanba ne’e, Ministériu Públiku akuza arguidu komete krime arma branka previstu iha Lei nú: 5/2017 no omesídiu ho forma tentadu iha artigu 138 Kódigu Penál Timor-Leste.
Audiénsia julgamentu ne’e, prezide husi juíz koletivu kompostu husi José Gonçalves, José Quintão, Jumiaty Freitas, Ministériu Públiku reprezenta husi prokuradór Renato Bere Nahac, arguidu hetan asisténsia legál husi defensór públiku, Fernando de Carvalho.
Jornalista: Natalino Costa
Editór: Xisto Freitas da Piedade
