DILI, 07 Marsu 2025 (TATOLI)-Diretór Nasionál ba Dezenvolvimentu Igualdade Jéneru iha Sekretária Estadu Igualdade no Inkluzaun, José do Rosario, hatete importante partisipasaun feto iha ekonomia formál, nune’e bele moris iha sustentabilidade.
“Eventu ne’e la’ós de’it hasa’e vizibilidade ba negósiu sira ne’ebé lidera hosi feto sira maibé mós hametin sira-nia partisipasaun iha ekonómia formál”, hatete José do Rosario.
Nia hatutan eventu ne’e hatudu espozisaun sira kona-ba produtu agríkola lokál sira, artezenatu, no espesialidade kulinária sira, hamutuk ho diskusaun interativu sira kona-ba feto sira-nia saúde, asesu finanseiru, no negósiu sira ba dezenvolvimentu hodi haburas rede no fahe koñesimentu, inisiativa ne’e hakarak hasa’e konxiénsia públika kona-ba igualdade jéneru no kria oportunidade ekonómika sustentável ba feto sira.
José do Rosario agradese ba World Vision no parseiru sira ne’ebé organiza, ne’ebé fó apoiu ba governu no povu Timor-Leste promove igualdade jéneru.
“Governu husu ba parte hotu-hotu atu hamutuk hodi fó apoiu ba feto sira iha Timor-Leste”, nia dehan.
Diretór Nasionál World Vision Timor-Leste, Jared Berends, hatete presiza investe feto tanba feto mak xave ba dezenvolvimentu.
“Hakbi’it feto sira ekonómia, bainhira feto sira buras, komunidade sira buras. Liuhusi projetu POWER, ami ekipa feto sira ho ferramenta, rekursu, no rede sira ne’ebé presiza atu hetan susesu iha negósiu no foti desizaun ohin loron, sira-nia eventu selebrasaun ida ba rezisténsia, kreatividade, no lideransa, ami fiar katak investe iha feto mak xave atu harii Timor-Leste ida ne’ebé inkluzivu no prósperu liu”, nia dehan.
Embaixadór UE nian ba Timor-Leste, Marc Fiedrich, afirma UE hanesan doadór ba projetu POWER kompromete empodera ekonomia feto.
“Ami hein atu haree rekoñesimentu maka’as liután ba feto sira-nia kontribuisaun ba kreximentu ekonómiku, aumentu apoiu ba sira-nia negósiu no importante liu sentidu empoderamentu komunidade nian ne’ebé sei dudu sira ba oin. Ba feto hotu-hotu iha ne’e ohin-ita-boot sira la’ós de’it forma ita-boot sira-nia negósiu, ita-boot sira forma futuru Timor-Leste nian”, dehan.
Eventu ne’e organiza liu husi projetu ne’ebé finansia husi Uniaun Europeia (UE), “Promosaun ba Feto liuhusi Empoderamentu Ekonómiku no Direitu (POWER)”, feira ida ne’e fornese plataforma ba feto emprezária sira husi Kovalima no Oekusi, hodi hatudu sira-nia produtu, fahe ideia, negósiu, no liga ho sosa-na’in, investidór, no parseiru potensiál sira.
Selebra Loron Mundiál Feto ne’ebé akontese iha 8 Marsu ne’ebé 2025, Forum Komunikasaun ba Feto Timor Lorosa’e (FOKUPERS) hamutuk ho World Vision Timor-Leste (WVTL), ne’ebé iha parseria ho Fundasaun Esperansa Enklave Oekusi (FEEO), loke feira merkadu nian ne’ebé hala’o durante loron tolu hahú hosi loron 6-8 marsu.
Selebrasaun tinan ida ne’e halibur reprezentante husi ajénsia, Governu, instituisaun finanseira, mídia, no organizasaun komunitáriu sira.
Notísia relevante: PN Kongratula Selebrasaun Loron Feto Mundiál Ho Unanimidade
Jornalista : Osória Marques
Editora : Rita Almeida
