DILI, 07 Marsu 2025 (TATOLI)—Komandante Unidade Patrullamentu Fronteira (UPF), Superintendente Polísia Euclides Belo, hateten iha inísiu fulan-Marsu, UPF hala’o patrullamentu iha liña fronteira Batugadé konsege halo apreensaun ba obralan (OB) ka roupa uzada hamutuk karón 26.
“Ami lansa ekipa Sekreta Servisu Informasaun nian ne’ebé iha loron 04 Marsu ami apreende objetu kontra bandu OB ka roupa uzada ho totál hamutuk karón 26,” Euclides hateten ba jornalista sira iha edifísiu Komandu Jerál PNTL, Kaikoli, sesta ne’e.
Nia esplika, sasán sira-ne’ebé UPF halo apreensaun ne’e UPF la hetan nia na’in tanba na’in ba sasán sira-ne’e halai sees husi fatin ne’ebá, maibé suspeitadu ba sidadaun Timor balun ne’ebé atu transporta ba nasaun viziña Indonézia.
Komandante UPF ne’e hatutan sasán kontra bandu ne’ebé UPF halo apreensaun ne’e iha Mota-Ain, iha Aiteka-Laran, área Batugadé no sasán hirak-ne’e UPF tula kedas bá Komandu UPF hodi prosesa bá Ministériu Públiku.
Euclides husu ba timoroan hotu-hotu ne’ebé tama-sai iha liña fronteira atu kumpri regra ne’ebé Estadu estabelese ona.
“Bainhira sidadaun sira la kumpri regra, sei prosesa tuir lei ne’ebé vigór,” Komandante UPF fó hanoin.
Jornalista: Natalino Costa
Editór: Xisto Freitas da Piedade
