DIILI, 10 Marsu 2025 ( TATOLI)—Komandante Jerál Polísia Nasionál Timor-Leste (PNTL), Komisáriu Jerál Henrique da Costa relata katak durante Janeiru to’o Fevereiru 2025, Komandu Jerál PNTL liuhusi Diresaun Tránzitu Seguransa Rodoviária Nasionál arekada (rekolla) reseita $165.424 ba kofre Estadu.
Henrique esplika katak reseita sira-ne’e mai husi atividade pasa revista (check point) ne’ebé mak Tránzitu Komandu PNTL munisípiu sira no Diresaun Nasionál Seguransa Tránzitu Rodoviária halo inklui atividade pasa revista ba viatura sira-ne’ebé tama no sai iha fronteira ne’ebé hala’o husi Unidade Patrullamentu Fronteira (UPF).
“Reseita sira-ne’e mai husi atividade check point ne’ebé halo husi Tránzitu sira iha territóriu tomak liuliu ba infratór sira selu koima inklui atividade ita-nia Unidade Patrullamentu Fronteira halo pasa revista karreta-motór ne’ebé tama no sai iha área fronteira ho Indonézia,” Henrique da Costa dehan iha nia intervensaun bainhira enkontru ho Ministru Interiór, Francisco da Costa Guterres, iha Kuartél Jerál PNTL, Kaikoli, segunda ne’e.
Aleinde ne’e, Komisáriu Jerál Henrique informa, iha Janeiru-Fevereiru PNTL rejista kazu hamutuk 784.
Nia haktuir katak kazu krime sira-ne’e maioria ofensa integridade fízika ne’ebé mak rejistada iha munisípiu sira no tuir filafali mak kazu maus tratos ka kazu violénsia doméstika nian ne’ebé mak rejistada aas mós iha munisípiu sira.
Nune’e mós, nia dehan, durante Janeiru no Fevereiru, PNTL rejista númeru asidente tráfegu hamutuk 333. Husi asidente ne’e, ema na’in 14 lakon vida, na’in 68 kanek todan no barak hetan kanek kamaan.
Jornalista: Natalino Costa
Editór: Xisto Freitas da Piedade
