DILI, 10 Marsu 2025 ( TATOLI)—Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, hateten Komandu PNTL trasa ona programa atu hala’o vizita bá eskola sira.
Programa ne’e sei implementa husi Ofisiál Polísia Suku (OPS) inklui Departamentu Investigasaun Kriminál (DIK) ho objetivu sosializa edukasaun sidadania no lei ba estudante sira atu prevene violénsia iha eskola.
“Servisu Polisiamentu Komunitáriu ninian ho mós Servisu Investigasaun Kriminál hala’o atividade prevensaun krime iha eskola sira. Programa ne’e sei to’o bá iha Komandu PNTL munisípiu sira,” Henrique da Costa informa iha nia intervensaun bainhira hala’o enkontru ho Ministru Interiór, Francisco da Costa Guterres, iha Kuartél Jerál PNTL, Kaikoli, segunda ne’e.
Nia dehan, iha munisípiu Dili, semana kotuk OPS hahú implementa ona. “Programa ida-ne’e nu’udár meiu atu prevene krime iha eskola,” nia esplika.
Misaun Instituisaun Polísia Nasionál Timor-Leste (PNTL) mak forsa siguransa ida-ne’ebé atu defende Legalidade Demokrátika hodi garante siguransa ba sidadaun Timor-Leste no asegura direitu sidadaun tuir kondisaun ne’ebé estabelese ona iha Konstituisaun RDTL artigu 147 no lei orgánika 09/2009 artigu 1.2.
Jornalista: Natalino Costa
Editór: Xisto Freitas da Piedade
