DILI, 11 Marsu 2025 (TATOLI)—Ministru Prezidénsia Konsellu Ministru, Agio Pereira, husu Polísia Nasionál Timor-Leste (PNTL) kontinua servisu ho profisionál hodi manán konfiansa povu tanba konfiansa povu ba PNTL ne’e krusiál.
Governante ne’e dehan, Polísia Nasionál Timor-Leste nu’udár instituisaun Estadu ninian ho responsabilidade fó seguransa ba povu no nasaun iha loron hitu iha oras 24 nia laran ne’ebé ho responsabilidade boot tebes-tebes.
“Ha’u dehan konfiansa populasaun ba PNTL ne’e krusiál tebes-tebes para PNTL iha lejitimidade atu uza forsa para serbí nasaun, serbí interese komún. Sein konfiansa komunidade nian, PNTL bele lakon lejitimidade utiliza forsa,” Agio hateten iha nia intervensaun bainhira partisipa iha semináriu nasionál iha ámbitu komemorasaun aniversária Polísia Nasionál Timor-Leste (PNTL) ba dala 25 ne’ebé ho tema “Hamutuk Ita Hametin Konfiansa ba Polísia Nasionál Timor-Leste”, iha Sentru Formasaun Polísia (CFP-sigla portugés), Komoro, tersa ne’e.
Nia lembra katak iha tinan 25 kotuk, PNTL mosu iha situasaun ida-ne’ebé komplikadu tebes tanba mosu iha tempu tranzisaun.
“Ita tenke kria situasaun katak tenke serbí populasaun no presiza tempu para manán konfiansa husi populasaun no komunidade ninian,” nia haktuir.
Governante ne’e hatutan PNTL ho nia lideransa no lideransa polítika nasionál konsege ultrapasa situasaun difísil no komplexu tebes hanesan iha krize 2006, iha-ne’ebé akontese masakre hamate membru polísia balun.
Agio tenik importante ba Governu entende katak instituisaun hotu-hotu inklui PNTL nia rekursu importante liu.
“Rekursu umanu ne’e importante, entaun Governu tenke investe esforsu tomak hodi apoia rekursu para asegura PNTL iha kualidade aas hanesan kapasidade intervensaun iha komunidade, iha kapasidade jestaun, iha kapasidade entendimentu polítika no iha kapasidade hodi komprende polítika,” nia konklui.
Jornalista: Natalino Costa
Editór: Xisto Freitas da Piedade
