DILI, 12 Marsu 2025 (TATOLI)—Inspetora Jerál Autoridade Inspesaun Fiskalizasaun Atividade Ekonómika, Sanitária no Alimentár (AIFAESA ), Odete Viegas, hateten AIFAESA reativa hikas empreza Perissos hodi halo atividade negósiu tanba kondisaun ijiene ona.
“Iha loron 15 Fevereiru liubá, AIFAESA halo servisu ida-ne’ebé mak intensivu tebes, entaun iha momentu ne’ebá, ita detekta katak iha empreza Perissos nian komete irregularidade lubuk ida hanesan kondisaun ijiene ladi’ak, foos estragadu no mós sasán liu prazu,” Odete Viegas informa ba jornalista sira, iha armazein Perissos, Fatuhada, Dili, kuarta ne’e.
“Ita halo sansaun asesoria ne’e signifika katak ita halo salajen temporária. Bele fulan ida ka fulan tolu ho objetivu ida katak atu fó biban ba empreza sira atu hadi’a fali prosedimentu ne’ebé mak durante ne’e AIFAESA fó. Depois ita halo salajen, empreza nafatin hala’o nia servisu no sira informa ba AIFAESA atu halo re-inspesaun ba servisu sira-ne’ebé mak halo durante iha loron hirak liubá. Entaun, ekipa AIFAESA hamutuk ho ekipa konjunta sira halo re-inspesaun datoluk no ikus halo iha horisehik (11/03) katak sira kompleta ona rekizitu husi AIFAESA,” nia hatutan.
Nia esplika katak prosesu administrativu la’o nafatin, signifika katak dentru loron 30 sira bele hato’o sira-nia rekursu aseita ka la aseita rekizitu ne’ebé AIFAESA fó. Se la aseita tenke justifika nune’e AIFAESA bele hato’o sansaun koima.
“Ami agora seidauk fó multa ba empreza Perissos, tanba ami sei hein notifikasaun dentru loron 30 sira atu hatoo sira-nia rekursu banhira sira aseita ona,” Odete informa.
Notísia relevante: AIFAESA rekomenda ba Perissos hadi’a ijiene
Nia dehan katak koima ne’ebé aplika depende ba nia gravidade, hahú husi $250 no banhira ne’e grave bele to’o montante boot.
Iha fatin hanesan, advogadu privadu husi empreza Perissos, Câncio Freitas, dehan bazeia ba inspesaun AIFAESA nian ne’ebé hala’o iha armazein Perissos iha loron 15 Fevereiru no identifikadu katak empreza Perissos halo infrasaun hasoru item 22.
“Husi desizaun temporária ne’ebé mak identifika ba ami iha loron 15 Fevereiru, haruka ami atu hadi’a fatin hodi responde ba sira-nia pedidu item 22, entaun iha momentu ne’e kedas ami kumpri item 22 mak ohin atividade ne’e bele la’o filafali,” Câncio haktuir.
Nia dehan, item 22 ne’ebé mak sira rekomenda atu hadi’a mak hanesan haris fatin, halo separasaun ba foos sira hanesan masin-midar tau ketak, sasán produtu esensiál seluk ne’ebé mak iha hanesan rinsu, sabaun, supermie, masin tau ketak inklui lataria sira tau ketak ho sira seluk.
Sei fó sansaun ba Paramitha
Aleinde ne’e, Inspetora AIFAESA hateten AIFAESA deteta mós empreza Paramitha uza matéria prima liu prazu, maibé sei hein relatóriu husi tékniku sira hafoin bele fó sansaun.
“Paramitha ninia ijiene di’ak hela, entaun ita la presiza taka, maibé sira-nia produtu espiradu nune’e sira presiza selu koima ba Governu. Maibé, ida-ne’e ami sei hein relatóriu ne’ebé mak tékniku sira iha terenu hato’o mai, nune’e ita bele foti desizaun koima hira mak sira presiza selu,” Odete tenik.
Jornalista: Felicidade Ximenes
Editór: Xisto Freitas da Piedade
