DILI, 13 Marsu 2025 (TATOLI) – Governu Portugál ne’ebé foin hala’o knaar kuaze fulan 11 xumba iha tersa-feira ne’e bainhira falla hetan votu sufisiente iha mosaun konfiansa iha parlamentu.
Tuir notísia ne’ebé TATOLI sita husi ANTARA, Governu minoritáriu ne’e monu kauza husi suspeita ba halo korrupasaun ne’ebé envolve Primeiru-Ministru Luís Montenegro.
Ida-ne’e sai insidente daruak iha istória Portugál dezde ditadura temina iha 1974, iha ne’ebé Governu monu kauza husi deskonfiansa husi parlamentu.
Deskonfia mosu korrupsaun hasoru Montenegro ne’e relasiona ho nia família nia negósiu, Spinumviva.
Nia harii empreza ne’e antes tama iha mundu polítika, maibé nia propietáriu ne’e depois transfere ba nia fen no nia oan na’in-rua bainhira nia ativu halo polítika.
Montenegro antes ne’e hasoru mosaun deskonfiansa: dahuluk iha 21 Fevefereiru husi partidu estrema-direita Chega, no daruak iha loron 04 Marsu husi Partidu Komunista Portugés (PCP).
Atu rezolve krize polítika ne’ebé afeta nia governasaun, Montenegro depois aprezenta mosaun konfiansa.
Iha votasaun iha parlamentu ne’ebé ho membru 230, Governu Montenegro hetan de’it votu 88, enkuantu votu 142 seluk kontra.
Aleinde Partidu Sosiál Demokrata (PSD) no Partidu Demokrata Kristaun ne’ebé nu’udar parte husi Governu minoritáriu, só Partidu Inisiativa Liberál husi opozisaun mak apoia mosaun konfiansa ne’e.
Aleinde ne’e, Partidu Sosialista (PS) no partidu opozisaun sira seluk, nomós Chega, ne’ebé antes ne’e apoia Governu minoritáriu, fó filafali votu kontra.
Iha nia diskursu iha parlamentu, Montenegro akuza PS mak kauza instabilidade ekonómika, ho razaun katak povu Portugál lakohi eleisaun antesipada.
Montenegro mós fó sai katak nia sei kandidata aan fali ba primeiru-ministru liuhusi nia partidu.
Maibé, líder PS, Pedro Nunes Santos, ezije katak Komisaun Inkéritu Parlamentár forma atu investiga akuzasaun hasoru Montenegro hanesan rekizitu atu dada mosaun deskonfiansa.
Santos sublinã katak krize ne’e totalmente kauza husi “Montenegro ne’ebé lakohi klarifika akuzasaun hasoru nia”.
PS avalia katak tempu serbisu Komisaun Inkéritu loloos hala’o durante loron 90, la’ós 15 de’it hanesan proposta Governu, ho razaun katak proposta Ezekutivu ne’e “la sériu”.
Depoizde Governu monu, povu Portugál sei hasoru fali elisaun datoluk iha tinan tolu ikus ne’e.
Prezidente Portugál Marcelo Rebelo de Sousa sei anunsia data eleisaun antesipada, posivelmente iha loron 11 ka 18 Maiu.
Tuir peskiza opiniaun husi órgaun komunikasaun Portugál, krize polítika ne’ebé atinje Governu ne’e aumenta apoiu ba PS, ne’ebé iha poténsia manán iha sufrájiu ne’ebé sei mai.
Tinan dahuluk Governu minoritáriu
António Costa, ne’ebé agora asume kargu hanesan Prezidente Konsellu Europeu, demite-aan husi nia pozisaun nu’udar primeiru-ministru iha Novembru 2023 bainhira sai suspeitu ba kazu korrupsaun, maski antes ne’e nia reeleitu iha eleisaun iha 30 Janeiru 2022.
Depoizde sufrájiu, Montenegro forma governasaun minoritária iha 02 Abríl 2024.
Tuir relatu husi mídia Portugál, empreza família Montenegro, Spinumviva, envolve iha kooperasaun ho Solverde, empreza ne’ebé iha konsesaun iha otél barak no kazinu iha Portugál.
Suspeita seluk mensiona katak Montenegro, ne’ebé hanesan mós advogadu, antes ne’e sai hanesan asesór jurídiku Solverde iha negosiasaun importante entre Governu relasiona ho konsesaun kazinu iha 2018-2022.
Responde ba relatu ida ne’e, Solverde iha loron 04 Marsu fó sai katak kansela ona nia kontratu ho Spinumviva atu “proteje naran di’ak empreza nian”.
TATOLI
