DILI, 13 Marsu 2025 (TATOLI)-Bazea ba identifikasaun prosesu despezu administrativu husi SEATOU (Sekretáriu Estadu Asuntu Toponímia no Organizasaun Urbana) ba komunidade iha Beto-Leste, suku Madohi, antes ne’e iha fulan rua liubá, hamutuk na’in-133. Maibé, komunidade afetadu sira rejeita no la konkorda ho polítika sobu ka muda komunidade husi sira-nia hela fatin.
Antes ne’e iha ona dialógu entre ekipa konjunta no komunidade katal sei halo identifikasaun hodi halo análiza ba kategória husi uma sira ne’e pertense iha uma provizóriu, uma semi-permanente no uma permanente, hafoin ne’e mak sei lori fali rezultadu levantamentu ba komunidade no halo notifikasaun eskrita ba komunidade sira atu hahamuk fatin.
“Hodi hamosu pontus konkordánsia entre komunidade afetadu no ekipa konjunta iha diálogu balun kona-ba ekipa konjunta informa mai ami sei halo levantamentu ba análiza kategória uma nian no sei halo notífikasaun eskrita ba komunidade liuhusi autoridade lokál atu hamamuk fatin”, Portavóz Cristovão de Araújo, deklara perante jornalista sira liuhusi konferénsia imprens, segunda ne’e.
Maibé, tuir portavóz ne’e, liu fulan ida komunidade afetadu sira simu fali informasaun verbál husi autoridade lokál iha semana kotuk katak komunidade ne’ebé hetan ona marka atu hamamuk fatin nune’e ekipa konjunta bele halo prosesu despezu administrativu.
“Liu tiha fulan ida ami komunidade afetadu simu fali informasaun verbál husi autoridade lokál iha loron 09 Marsu ne’e katak, komunidade afetadu sira ne’ebé hetan ona númeru markasaun atu hamamuk fatin nune’e ekipa konjunta atu halo nia servisu”, nia haktuir.
Portavóz ne’e hatutan tan katak aktu ida ne’e hatudu momoos no loloos Governu laiha seriedade atu trata nia komunidade sira ho dignu tuir prinsípiu sira ne’ebé vigór iha konstituisaun Timor-Leste.
Razaun tanba komunidade sira rejeita no la konkorda ba aksaun eviksaun husi SEATOU ne’e, tanba, komunidade nia moris sai vulneravél liután tanba impaktu husi sira-nia uma hetan sobu no harahun husi Governu ida. Nune’e komunidade sira hakarak alerta ba komunidade seluk ne’ebé hetan afetadu atu junta hamutuk forsa hodi halo aksaun pasífiku hasoru Governu.
Jornalista: Alexandra da Costa
Editór: Rafael Ximenes de A. Belo
