DILI, 13 Marsu 2025 (TATOLI)—Ministériu Públiku (PM) liuhusi Prokuradór Titulár, Rogério Viegas, deside halo arkivamentu ba kazu atuál Diretora Jerál Sevisu Korporativu Ministériu Agrikultura, Peska, Pekuária no Floresta (MAPPF) ho inisiál RG ne’ebé suspeitada ba kazu fó projetu ba malu iha 2023.
Defeza husi RG, Defensór Públiku, Francisco Caetano Martins, hateten hafoin Ministériu Públiku halo tiha verifikasaun no analiza ba faktu no prova sira liga ho kazu asistidu RG ne’ebé suspeita ba kazu fó projetu ba malu, Ministériu Públiku haree katak laiha indísiu krime atu RG ba arguidu no submete RG ba prosesu julgamentu iha Tribunál.
“Kuandu Ministériu Públiku verifika situasaun sira-ne’e, nia (Ministériu Públiku) haree katak laiha indísiu krime ruma, liuliu deskonfia fahe projetu ba malu,” Francisco hateten ba jornalista sira iha TJPID, Kaikoli, kinta ne’e.
Nia esplika, atu konstitui ema ida sai arguidu ne’e tenke prenxe elementu krime ka tenke iha indísiu ruma bazeia ba faktu no prova katak ema ne’e envolve duni krime.
Nia haktuir, kazu RG laiha faktu sufisiente tanba bainhira Ministériu Públiku halo analiza no ezaminasaun ba faktu no prova sira bazeia ba keixa sira-ne’ebé inklui dokumentu sira, Ministériu Públiku haree katak krime ne’ebé imputa ba RG la prenxe rekizitu krime, katak RG la envolve duni krime korrupsaun ativa no pasiva. Tanba ne’e, Ministériu Públiku deside arkiva tiha kazu ne’e.
“Arkivu tanba Ministériu Públiku halo investigasaun ba prova katak laiha indísiu pratika krime ne’ebé mak imputa ba arguidu,” Francisco argumenta.
Defeza ne’e fundamenta katak Ministériu Públiku arkiva tiha nia asistidu RG nia prosesu iha loron 28 Fevereiru 2025 no kuandu MP arkiva tiha prosesu ne’e, Ministériu Públiku mós notifika kedas nia hanesan defeza ba RG.
Jornalista: Natalino Costa
Editór: Xisto Freitas da Piedade
