DILI, 13 Marsu 2025 (TATOLI)—Tribunál Judisiál Primeira Instánsia Dili (TJPID), kinta ne’e, halo julgamentu ba membru Polísia Sientífika Investigasaun Kriminál (PCIC-sigla portugés) ho inisiál DdS no MGM tanba harahun vidru janela edifísiu PCIC iha tinan 2023.
Arguidu DsD nu’udár membru Polísia Sientífika Investigasaun Kriminál ne’ebé hala’o kna’ar iha Diresaun Intelejénsia no arguida MGM nu’udár pesoál Servisu Laboratóriu iha PCIC.
Tuir akuzasaun Ministériu Públiku katak kazu ne’e akontese iha loron 4 Setembru 2023 iha tuku 19:00 Ot mosu diskusaun entre arguidu DdS no MGM to’o mosu dezentendimentu, nune’e arguidu DdS nervu hodi tuku rahun vidru. Vidru ne’ebé arguidu DdS tuku rahun ne’e ho folin $80.00.
Ho hahalok membru PCIC na’in rua ne’e mak Ministériu Públiku konstitui krime ho forma Kostumava Danu Agravadu ne’ebé previstu no punidu iha artigu 259 husi Kódigu Penál Timor-Leste.
Hatán ba akuzasaun Ministériu Públiku nian ne’e, iha sala julgamentu laran, arguida MGM no arguidu DdS deklara ba Tribunál katak akuzasaun sira-ne’e loos hotu.
Arguida MGM deklara katak momentu ne’ebá mosu duni diskusaun entre nia ho arguidu DdS kona-ba asuntu privadu no mós asuntu servisu. Iha diskusaun ho tensaun aas uitoan no to’o nervu mak nia halai ba dudu arguidu DdS no arguidu DdS nia liman kona vidru ne’ebé iha janela edifísiu PCIC nian nune’e monu mak rahun.
“Momentu ne’e ami rua diskute asuntu privadu ne’ebé liga ba servisu nian mak ha’u nervu ba dudu nia (arguidu DdS) ba parede, nune’e nia liman kona vidru mak vidru monu tuun ba rahun tiha,” arguida MGM deklara iha sala julgamentu TJPID, Kaikoli.
Nune’e mós, arguidu DdS rekoñese altura ne’ebá nia ho arguida MGM diskute asuntu privadu no servisu nian maibé tanba nervu entaun mosu tiha dezentendimentu, liman loos mak kona vidru no rezulta vidru monu.
“Maibé hafoin problema, ami rua deside hola vidru foun mai monta kedas,” nia haktuir.
Nia dehan, vidru ne’e nia folin $15, maibé selu ema monta mak to’o $80.00, la’ós vidru ne’e mak folin $80.00. Nia mós hakfodak bainhira funsionáriu PCIC lori kazu referidu mai to’o Tribunál.
Maibé, momentu kazu ne’e akontese, arguidu DdS informa kedas ba Diretór Polísia Sientífika Investigasaun Kriminál aplika ona sansaun disiplinár ba arguidu sira.
Iha biban ne’e, Ministériu Públiku ne’ebé reprezenta husi prokuradora Benvinda do Rosário husu ba Tribunál atu absolve arguidu husi krime ne’ebé Ministériu Públiku imputa ba nia.
Nia dehan, arguidu na’in rua nia asaun ne’e seidauk rezulta dolo ruma katak seidauk halo asaun ruma tanba foin dudu malu, seidauk rezulta buat ruma. Enkuantu, vidru monu ne’e tanba arguidu nia liman kona de’it, tanba ne’e dolo por negligente.
Dolo por negligente ne’e la deskreve iha Kódigu Penál, tanba ne’e hahalok ne’ebé arguidu na’in rua komete la prenxe elementu krime husi kime danu agravadu ne’ebé previstu iha artigu 258 no 259 husi Kódigu Penál Timor-Leste.
Enkuantu, defeza husi arguidu sira, Adelina, husu ba Tribunál Koletivu atu absolve nia kliente sira husi krime danu agravadu ne’ebé Ministériu Públiku imputa ba sira tanba la prenxe ba elementu krime.
Hafoin Tribunál rona tiha parte hotu, Tribunál Koletivu liuhusi juíz José Araújo marka fali julgamentu iha loron 24 Marsu 2025 tuku 15:00 Otl hodi foti desizaun ba kazu ne’e.
Julgamentu ne’e prezide husi juíz koletivu kompostu husi José Araújo, Ercilia de Jesus no Ana Paula Fonseca.
Jornalista: Natalino Costa
Editór: Xisto Freitas da Piedade
