DILI, 13 Marsu 2025 (TATOLI)—Komandante Polísia Nasionál Timor-Leste (PNTL) Munisípiu Ainaro, Superintendente Asistente Polísia, Luís da Silva, hateten Unidade Espesiál Polísia (UEP) liuhusi sesaun Explosive Ordinance Disposal (IOD) harahun ona materiál funu ne’ebé mak komunidade Postu Administrativu Maubisse hetan iha fulan kotuk.
Materiál funu ne’ebé mak komunidade Postu Administrativu Maubisse hetan mak hanesan dilagrama hamutuk 30-resin, iha-ne’ebé IOD sira lori bá harahun iha Taibor ne’ebé lokaliza iha área Aileu nian.
“Sasán sira-ne’e ita-nia katuas sira iha Postu Administrativu Maubisse mak hetan. Balun hetan iha mota laran no balun hetan iha toos laran. Sira ta’uk, tan ne’e sira mai informa bá Eskuadra Polísia Maubisse no Komandante Eskuadra Maubisse informa bá Komandu Polísia Munisípiu Ainaro hodi asegura materiál funu sira-ne’e para labele fó impaktu ba ema. Nune’e, ha’u halo relatóriu bá Komandante Jerál PNTL no Komandante Jerál despaxa bá UEP haruka sira IOD karreta ida mai horisehik (12/03) hodi harahun ona materiál funu ne’e,” Luís da Silva hateten ba TATOLI via telefónema, kinta ne’e.
Komandante ne’e husu ba komunidade Munisípiu Ainaro karik hetan materiál funu sira hanesan ne’e tenke asegura halo didi’ak no kuidadu.
“Karik haree sasán sira hanesan ne’e labele pániku, asegura no labele book. Dalaruma balun sei ativu no balun mós la ativa ona, maibé ita tenke kuidadu nafatin. Kuandu hetan informa kedas bá Polísia Eskuadra ka bá polísia sira-ne’ebé besik atu polísia bele halo intervesaun hodi prevene fó impaktu ba ema seluk nia vida tanba sasán sira-ne’e perigu ba ema-nia vida,” nia konklui.
Jornalista: Natalino Costa
Editór: Xisto Freitas da Piedade
